Jamita Minggu 25 Agustus 2024 Minggu Pasampulutoluhon Dung Trinitatis tarsurat di Epesus 6 ayat 10 - 20. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Margogo di Bagasan Tuhan." Rap ma hita mangihuthon hatoranganna.
Pendahuluan
Buku Epesus i ma songon surat na tinongos ni Apostel Paulus mandapothon huria na adong di luat Epesus, angka na porsea di Jesus Kristus (ida Epesus 1:1). Alai ndada holan mandapothon huria na adong di luat Epesus angka tona na dijamitahon di surat on, sahat do tu angka luat na asing jala nuaeng sahat do nang tu hita. On ma na patangkashon paboa Surat Epesus on mandapothon angka na porsea di Jesus Kristus di saluhut portibi on.
Angka na ditonahon di Buku Epesus on mamparbohali angka na porsea di Jesus Kristus asa marhagoon di bagasan Tuhan i di na mandalani angka ngolu di portibi on. Boasa ingkon diparbohali marhite Hata ni Debata hita asa marhagogoon di bagasan Tuhan i? Tangkas do taboto, di ganup pardalanan ni ngolu, mansai ragam do angka na mambahen rohanta lomos jala mabiar mandalani angka sidalanan i. Ndang dihalomohon Debata angka na porsea i gabe mabiar mamolus angka sidalananna be. Alai ingkon do marhagoon angka na porsea i di bagasan Tuhan di na mandalani ganup ngolunasida.
Tangkas do taboto lam godang do angka hamaolon na tabolus di pardalanan ni ngolunta. Ragam do angka parsoalan na masa, na olo mambahen hita gabe gale jala gabe mandao hita sian Tuhanta. I do asa diparbohali marhite turpuk ni Jamita on, marhite bohal na sian Debata, i ma HataNa, asa marhagogoon hita di bagasan Tuhan i.
Pembahasan
Roha na Togu di Bagasan Tuhan (ayat 10)
Sai adong dope na deba na marpangantusion mandok ia molo dung jonok tu Tuhan i, marhite angka parsaoran manang marhite angka tangiang jala togu marhaporseaon tu Jesus Kristus, ndang tagamon be jumpang angka hamaolon dohot ragam ni angka parsoalan di bagasan ngolu ni hajolmaon. Ala ni pangantusion na si songon i, sipata gabe olo do na deba mandele ala tarhirim di angka na denggan songon pangantusion si songon i.
Hape olo do sipata, ia dung lam dipajonok parsaoranna tu Tuhan i, songon na lam godang do angka parungkilon na diadopi, lam godang muse do angka na olo mambahen rohana gabe gale. Alai asa unang gabe madabu jolma i tu roha na gale dipargogoi Debata do hita marhite HataNa. Jala tandi do hagogoon na sian Tuhan i maralohon angka hagogoon na adong di portibi on.
Didok Apostel Paulus di ayat 10 " ... gabe togu ma rohamuna di bagasan Tuhan i ... ." Lapatanna ingkon barani do angka na porsea i manghatindanghon Tuhan i di ngoluna jala dipeop ma, na Tuhan i do na margogoihon ngoluna di ragam ni angka hamaolon i. Gabe ndang mura be madabu di bagasan hagaleon, ala gogo na sian Tuhan i do gogo na mangalo angka ragam ni hamaolon i.
Sian dia ma hataridaanna di ngolu si ganup ari paboa naung manghangoluhon gogo na sian Tuhan i? Ingkon tangkas do tarida i di ngolu parsaoran dohot Tuhan i, ingkon tangkas do panindangionta di Tuhan i ndang gabe mandele jala laos ditadingkon Tuhan i.
Manolukhon Pahean Sinjata Sian Debata (ayat 11)
Didok di ayat 11 "Solukhon hamu ma pahean sinjata na sian Debata ... ." Molo tu sahalak soldadu didok asa mamangke pahean nang sinjata nunga be diantusi boasa ingkon pangkeonna i, jala boasa ingkon mamangke sinjata. Pintor diantusi do paboa ingkon paradeonna dirina laho marporang, mangalo angka musu. Jala nda tung pola mangarade diri mamangke angka pahean parporangan nang sinjata molo holan pangkeonna sambing songon i. Muse pe nda tung marporang nasida so pangkeonna angka pahean parporangan nang sinjata molo laho mangalo angka musu.
Tudos tusi ma tona ni Apostel Paulus di turpuk on. Dipatudos ibana do ngolu ni jolma i songon ngolu na mangadopi parporangan, hinorhon ni i ingkon pangkeon ma pahean sinjata na sian Debata. Boasa pola ingkon pangkeon pahean sinjata na sian Debata i? Tutu di tonga ni ngolunta na marhaporseaon, sai na adong do angka musu, jala na gogo do musu i. Molo tapangke do gogonta sandiri mangalo angka musu i, ndada tolap hita disi. Molo so tapangke sinjata na sian Debata ndang boi talu angka musu i. Musu na nidok na, i ma utiutian ni sibolis. Na gabe sungkunsungkun, aha do pahean sinjata na sian Debata i? I ma ngolu ni partondionta, habadiaonta mangihuthon Hata ni Tuhanta, i do na boi mangondingi hita sian utiutian ni sibolis i.
Parungkilon ni na Porsea Maralohon Angka Huaso ni Hajahaton (ayat 12)
Musu na ingkon sialoon na dipatuduhon di turpuk on i ma ndada parungkilon laho mangalo mudar dohot sibuk, alai angka harajaon do, angka parhuaso, angka sigomgomi hasiangan haholomon on, angka tondi hajahaton na di ginjang i (ayat 12). Sude angka huaso na dipatuduhon di ayat i, i angka ma huaso ni portibi on na boi mamboan jolma i tu bagasan haholomon. Jala ndang na mura mangalo angka huaso i. Alai asa boi monang maralohon saluhutna i ndada boi hita holan mangasahon hagoonta sambing. Ingkon marhagogoon di bagasan Tuhan i do hita asa boi manghamonanghon parporangan i. Ala ni i molo pe sai ro angka paraloan di tongatonga ni huria nang di ngolunta, ndada sian Tuhan i angka i, alai sian huaso ni portibi on do i. Alai nang pe songon i, ingot ma hita holan sinjata na sian Tuhan i do na boi manghamonanghon hita maralohon saluhutna i.
Pahean Sinjata na Sian Debata Mangalo Angka na Jat (ayat 13)
Didok di ayat 13 "Dibahen i, jalo hamu ma pahean sinjata na sian Debata, asa tarbahen hamu mangalo di ari na jahat i, jala hot jongjong dung dipatunduk hamu sasude." Hita halak angka na porsea di Kristus, ingkon tapahot do hajongjongan ni haporseaonta di Tuhan i. Ingkon berjuang do hita mangalo angka hamusuon i di portibi on mangasahon Hata ni Tuhanta.
Marhohoshon Hasintongan jala Manolukhon Baju Partahanan Hatigoran (ayat 14)
Haradeon marporang mangalo hamusuon i di portibi on, ingkon do marhohoshon hasintongan di gonting (ayat 14). Molo nunga denggan hita marhohos tanda ni haradeon do i marporang marhite hasintongan. Dia do hasintongan i? I ma parsitutuonta, i ma sian ias ni rohanta mangalo hamusuon i. Ndang mabiar manang gabe mundur sian hasintongan i.
Marsipatu Pardamean Mamaritahon Barita na Uli (ayat 15)
Marsipatu ma patmuna. Molo nunga tapangke sipatu lao marporang, i ma hataridaan ni kesiapan laho mangalangka mangalo hamusuon i, ndang be mabiar hita mangalangka. Mangalangka huhut mamaritahon Barita na Uli, ndang mabiar jala ndang ragu.
Lombulombu Haporseaon nang Tahuluk Haluaon dohot Podang ni Tondi (ayat 16-17)
Jalo hamu ma lombulombu haporseaon. Lombulombu i ma songon sada pertahanan di diri, mangondingi sian sinjata ni musu manang panah. Lombulombu i ma na dipature sian hau huhut dilapisi muse mamangke kulit ni binatang. Jadi lombulombu i ingkon togu do, asa boi mangondingi diri sian anak panah dohot sinjata ni musu. Aha do lombulombu i? I ma haporseaonta i. Haporseaon i do na paluahon hita, haporseaon i do namangondingi hita sian angka hamusuon na ro sian sibolis na marhuaso di portibi on. Lombulombu haporseaon ni halak Kristen i ma haheheon ni Jesus Kristus sian hamatean dohot hamuliaonNa na di banua ginjang na mangatasi saluhut huaso ni portibi on. Debata do na manjagai angka na porsea di Ibana, jala Hata ni Debata i ma na gabe podang di hita marporang maralohon sibolis parjahat i.
Jugul Martangiang huhut Dungo (ayat 18)
Martangiang ma hamu. Apostel Paulus manosohon asa martangiang mardongan sandok pangidoan sian nasa unduk ni roha dohot sian nasa elekelek. Martangiang huhut dungo jala jugul tumangianghon saluhut angka na badia. On ma na pataridahon di angka halak na porsea, anggiat marhite sian i asa dijugulhon ma martangiang, lapatanna ndang holan parsahalian, ndang mansohot, jala marpanghirimon na ingkon pasahaton ni Debata do saluhut angka na tapangido i marhite tangiang.
Marhiras ni Roha Pabotohon Hahomion ni Barita na Uli (ayat 19-20)
Apostel Paulus pe, tongtong do ibana martangiang tu Tuhan i asa dipargogoi laho pasahathon hahomion ni Barita na Uli i, naung paboahon tu hita nunga be sada halak Jahudi dohot halak na so Jahudi (non-Jahudi), gabe sada huria na imbaru, sada daging di parsaoran na di bagasan Kristus. Holan Debata do partanobatoanta. Di bagasan Ibana do jumpang hita haluaon, songon si Paulus na martangiang mangido tu Tuhan i asa dipargogoi ibana manghatahon HataNa i, nang pe tarrante ibana. Alai pos do rohana di Tuhan i, na so tadinghonon ni Debata ibana molo pe marsitaonon angka naposoNa, i ma angka na porsea tu Ibana.
Kesimpulan dan Refleksi
Marhite naung dipasahat Apostel Paulus sada tudosan di angka na porsea songon na mangadopi parporangan jala diparbohali marhite pahean sinjata ni halak Kristen, sasintongna nunga singkop jala nunga rade be hita laho mangadopi parporangan i. Ai nunga diparbohali Tuhanta hita marhite pahean sinjata i. Boha do tu hita nuaeng, nunga tapangke sinjata na sian Debata mangalo angka hamusuon, maralohon angka huaso na adong di portibi on? Nunga gomos hita martangiang songon Apostel Paulus na manongtong ibana martangiang pajonok dirina tu Debata nang pe marsitaonon ibana?
Ingkon lam tapajonok do dirinta tu Debata asa lam margogo hita laho mandalani ngolu di portibi on. Unang mabiar, jala unang gabe sarombang hita dohot portibi on molo mangadopi angka na masa hita di ngolunta di portibi on. Ingkon porsea do hita, na donganan ni Debata do hita mangadopi saluhut angka na masa si adopanta i. Tapangke ma pahean sinjata na sian Debata. Ala ni i unang ganggu be roha nang pingkiranta.
Didongani Debata ma hita laho mangulahon panghobasionta di HuriaNa nang di portibi on. Ingkon biar mida Jahowa ma hita mangulahon saluhut panghobasionta i, asa tangkas hataridaan ni na marhagogoon hita di bagasan Tuhan i. Jala tongtong taingot asa tajugulhon martangiang jala dungo asa margogo hita mangalo huaso ni sibolis saluhutna. Molo pe margogo jala marhuaso portibi on mangelaela hita, alai poas ma rohanta na gumogo do huaso ni Debata sian saluhutna i. Amen.
1 komentar