Jamita Minggu 17 November 2024 Minggu Paduapululimahon Dung Trinitatis tarsurat di buku Mateus 24 ayat 9 - 14. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Angka na Manahan Ro di Ujungna Taruli Haluaon." Rap ma hita mangihuthon hatoranganna.
Pendahuluan
Mateus 24 on i ma panurirangion ni Tuhan Jesus taringot tu ajal ni hasiangan on, asa dungo jala jaga laho mangadopi harorona. Marmula do panurirangion on di na disuriranghon ni Jesus taringot tu halelengse ni bagas joro di Jerusalem. Di masa ni si Herodes, dipauli do bagas joro i mansai uli situtu, jala ummuli sian bagas joro na parjolo na pinajongjong ni Raja Salomo, jala ummuli muse sian Istana ni si Herodes sandiri. Las roha ni halak Jahudi, angka Siboto Surat nang angka sisean i, jala tarhatotong marnida hinauli ni bagas joro i. Pola do dipatuduhon nasida bagas joro i tu Tuhan Jesus.
Alai didok Jesus do mandok nasida: "Diida hamu sasudena i? Situtu do na Hudok on tu hamu: Ndang pasombuonna sogot disi dua batu martinditindi na so gargaronna" (ayat 2). Di na manghatahatai Jesus dohot angka siseanNa i, gabe disungkunnasida Jesus: "Paboa ma tu hami: Andigan masa i, jala dia ma tanda ni harorom dohot ajal ni hasiangan on?" (ayat 3). Ndang dipaboa Jesus torang andigan hamamasana, alai dipasahat do tu angka sisean i asa jaga. Ai na ro ma angka panurirang pargapgap jala na mandok dirina mesias. Ala ni i ingkon jaga jala dungo asa unang dililuhon. Masa ma angka porang marluatluat bangso maralohon bangso, masa ma nang haleon, jala masa ma nang lalo marluatluat. Alai ndang i dope ujungna, parmulaan ni pambebeonna i dope.
Andigan do sudena i masa? Hita angka na porsea di Jesus Kristus, pasti do mamolus haberniton, pangaleleion, jala gabe dihasogohon portibi on ala ni goar ni Tuhan Jesus. Hinorhon ni i olo do gabe godang na manadinghon haporseaonna jala mansoadahon Kristus i. Jadi toropma na targasip gabe masijehean jala masihosoman, gabe lam tu ngalina ma holong ni roha. Alai angka na manahan ro di ujungna, i do na paluaon ni Kristus i. Ala ni i, laho mangadopi ajal ni hasiangan on dohot ragam ni hamaolon na masa, adong do pigapiga na ingkon siparrohahononta jala siulaonta asa tongtong jaga jala dungo mangadopi i gabe manahan ro di ujungna jala taruli haluaon.
Pembahasan
1. Rade Manaon na Porsuk Ala ni Goar ni Kristus.
Dipaboa Jesus do na ingkon boluson ni angka na porsea di ibana haporsuhon, dipusa, dibunu dohot dihosomi. Angka na manghasogohon Tuhan Jesus dohot Barita Na Uli, i do na mambahen angka na porsea i tu haporsuhon. Haporsuhon i gabe sada mara bolon do i di angka na porsea. Adopan ni angka na porsea do sudena jala nunga jumolo Jesus, Tuhan ni na porsea mamolus saluhutna i. Umborat dope haporsuhon na binolus ni Jesus di ngoluNa. Alai nang pe songon i didok Hata ni Debata do: "Jesus, na manaonhon parsilangon i, singkat ni las ni roha, tohapna i hian, so dietong i hailaon, gabe hundul di siamun ni habangsa ni Debata!" (Heber 12: 2).
Apsotel Paulus pe godang do mangadopi ragam ni haporsuhon, alai taruli apulapul di bagasan Kristus do ibana jala angka haporsuhon na binolusna i gabe hadengganon do i dietong rohana patoguhon haporseaonna. Nang hita halak na porsea di Jesus pe sai na olo do ro tu hita haporsuhon i, saleleng di portibi on, ala ni hasatiaonta tu Tuhan Jesus dohot haporseaonta di Ibana. Alai nang pe songon i, ingkon tongtong do hita rade manjalo i ala ni Goar ni Kristus jala taingot ma ai sai na donganan ni Tuhan Jesus do hita jala paluaonna, dung i di ujungna partumpalonna dohot hamuliaonNa.
Rasul Paulus juga mengalami berbagai penderitaan, tetapi ia beroleh penghiburan dalam Kristus, bahkan ia menganggap biasa segala penderitaan yang dialaminya. Semua orang yang percaya kepada Kristus dapat mengalami penderitaan selama di dunia, karena ketaatan kita kepadaNya dan bagian dari iman Kristen. Yesus menyatakan akan adanya penderitaan yang datang melalui siksaan, dibunuh dan dibenci karena Ia pun telah mengalaminya semasa hidupNya. Penderitaan yang dialami Yesus di dunia ini dapat dikatakan sebagai penderitaan yang paling besar. Tetapi Alkitab memberitakan kepada kita: "Ia yang dengan mengabaikan kehinaan tekun memikul salib ganti sukacita yang disediakan bagi Dia" (Ibrani 12:2).
2. Jaga ma di Angka Panurirang Pargapgap.
Dipaboa Jesus tu angka siseanNa, torop ma angka panurirang pargapgap na hehe mangaliluhon angka jolma. Panurirang pargapgap i ma na sai pasumansuman manang na mandok dirina mesias. Di na lam jonok ajal ni hasiangan on, lam torop ma marhehean angka panurirang pargapgap, pangajari pargapgap, parjamita pargapgap. Sude do nasida marhatopothon angka parhaporseaon na polin jala naung manjalo pangungkapon na imbaru (wahyu yang baru) atik pe maralo tu Hata ni Debata. Gabe godang ma angka paraloan maradophon hasintongan di tongatonga ni huria, gabe manegai huria i (patudos 1 Timoteus 4:1 dohot 2 Timoteus 3:8).
Hape molo berengon hira na sintong jala tutu do idaon hadirion ni angka pargapgap i. Sai dipasumansuman do dirina songon birubiru (ida Mateus 7:15) hape na babiat panoro do (patudos Ulaon ni Apostel 20:29). Nunga tung godang masa angka si songon i, mamungka sian pardalanan ni huria na parjolo i sahat ro di tingki on. Dipangke sibolis i do nasida laho mangaliluhon haporseaon ni angka na porsea i. Ulaonnasida i ma asa lam torop na mangula sogo ni roha ni Debata Jahowa, na maralo tu Hata ni Debata.
Lam jonok nama ajal ni hasiangan on, jala lam godang do hajahaton, parmainanon, pangalangkupon, parmabuhon, parbadabadaon, hagunturon, mamangke angka obatobat terlarang, manggohi hagiot ni pamatang dohot angka lan na asing na maralo tu lomo ni roha ni Debata. Sudena i masa laho mangaliluhon haporseaon ni jolma i do. Ala ni i ingkon manat jala jaga do hita disi. Ingkon lam jonok jala lam tapasolhot ma dirita tu Hata ni Debata, asa unang mura hita dililuhon, gabe mandao sian Tuhan Debata i. DIpasupasu jala dipargogoi Tuhanta ma hita saluhutna. Amen.
Posting Komentar