Jamita Partangiangan Epistel Minggu 17 November 2024 Minggu Paduapululimahon Dung Trinitatis tarsurat di buku 1 Samuel 2 ayat 1 - 10. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Angka na Manahan Ro di Ujungna Taruli Haluaon." Rap ma hita mangihuthon hatoranganna.
Pendahuluan
Di halak Jahudi, tumubuhon anak di sinondukna gabe tugas dohot kewajiban ni sahalak parompuan naung marhamulian do i. Molo hol manang ndang boi sahalak parompuan mangalehon anak na gabe panean di sinondukna, gabe sada hailaon bolon jala tihas do i di baoana, keluarga manang sisolhotna nang dohot lingkungan sekitarna. On do na masa di si Hanna, ripe ni si Elkana. Na hol do si Hanna gabe ndang adong di ibana dohot si Elkana tubuna. Alai marimbang do si Hanna dibahen si Elkana. Si Pininna do goarna jala ditubuhon do anak dohot boru di si Elkana. Ganup jumpa tingki mamele si Elkana, sai dilehon do sude angka parjambaran tu jolmana si Pininna dohot tu saluhut anak dohot boruna, alai molo tu si Hanna ndang dia dilehon. Gabe sai marsak ma si Hanna binahen ni i, ai hailaan bolon do i di ibana. Dung i muse, imbangna si Pininna disungguli do hinamago ni si Hanna huhut sai manggitihi rohana, ala na hol do bortianna ndang boi tumubuhon anak ibana di si Elkana. Gabe sai marsak huhut tumatangis ibana.
Alai nang pe songon i sai martangiang do si Hanna tu Jahowa pasahathon parungkilon dohot pardangolanna. Di sada tingki martangiang ma ibana di manogot ni ari huhut tumatangis jala marbagabaga ibana tu Jahowa, molo ditatap Jahowa pardangolanna jala dilehon di ibana sada anak, lehonon ni si Hanna ma anak i muse tu Jahowa.
Ditatap Jahowa do pardangolan ni si Hanna na tongtong satia i ibana huhut marhaporseaon tu Jahowa. Ditangihon tagiangangna gabe dipungka Jahowa ma bortianna jala tubuan anak, dibahen ma goarna si Samuel, jala gabe malim bolon jala na sangap huhut tarbarita di Israel. Marningot pambahenan ni Jahowa i do umbahen martangiang si Hanna pasahathon pujipujian dohot mauliate ni rohana ala dilehon Tuhan i di ibana sada anak, i ma na disurathon di turpuk ni Epistel on. Molo tapamanat ayat on sian ayat 1-10, adong pigapiga na naeng siparsiajaranta, rap ma hita mangihuthonsa.
Pembahasan
1. Jahowa do Hagogoon dohot Hatimbulon (ayat 1)
Sian pengalaman partondion ni si Hanna dihatindanghon ibana do di tangiangna, Jahowa Debata do hagogon dohot haporusanna. Hagogoon dohot huaso ni Jahowa sambing do na mangalehon hatuaon dohot hatimbulonna marhite na mangalehon sada anak di ibana, atik pe naung hol ibana. Debata Jahowa sambing do hagogoonna maradophon angka musuna na mangarehei dohot manggitihi ibana. Ndang adong hagogoon ni si Hanna, ndang adong hagogoon songon gogo laho marporang di ibana, ndang adong sinjata, alai Jahowa mangalinggomi ibana jala dipatimbul ibana sian na lea hian ala na hol i ibana.
Mansai dangol do na dihilala ibana dibahen sinondukna si Elkana ala marimbang ibana dibahen. Sai dipauruuru, direhei, digitihi imbangna si Pininna ibana muse ala na so boi i tubuan anak. Tung dangol situtu do si Hanna hinorhon ni saluhutna i. Alai di pardangolanna i sai tu Jahowa do ibana mangalualu huhut tumatangis. Jahowa do dibahen ibana partanobatoanna dohot pangurupina. Sadia leleng pe ibana manaon pardangolanna i, sai tu Johowa do haporusanna.
Porseaa do si Hanna, Jahowa do mual ni hangoluan dohot haroroan ni nasa uli basa. I do umbahen asa sai tu Jahowa do dipasahat ibana pangidoanna, mangido anak, ai diboto ibana do na gogo jala tuk do huaso ni Tuhan i patupahon na pinangidona i. Binahen ni hasatiaonna dohot haporseaonna, gabe dipasupasu Jahowa ma bortianna naung hol i gabe tubuan anak ibana, na margoar Samuel.
2. Jahowa, Debata do Nampuna Parbinotoan (ayat 2-3)
Dihatindanghon si Hanna do holan Jahowa do nampuna nasa hapistaran. Ndang adong na so binoto ni Debata, ai lbana do na manompa langit tano ro di nasa isina. Molo adong pe parbinotoan ni jolma, ndang sadia i martimbanghon parbinotoan ni Jahowa.
Ala ni i laos dipaingot do hita asa unang sai tadatdati menganengahon haginjangon, perasaan na ummangat, umbisuk, umpistar dohot angka na asing. Tuhan Allah akan mengoreksi setiap ucapan sombong, pikiran yang terlalu membanggakan kekuatan sendiri. Diboto Debata do ro di dia hogogoon ni jolma. Ala ni i do sai dipodahon asa martoruk ni roha tu angka jolma na sai patimbohon dirina. "Barangsiapa meninggikan diri, ia akan direndahkan dan barangsiapa merendahkan diri, ia akan ditinggikan" (Matius 23:12).
3. Dipatutoru Debata do Angka na Patimbo Diri (ayat 4-5)
Ayat 4 dohot ayat 5 manaringoti angka jolma na mangetong dirina gumogo, dietong ala ni hagogoonna dohot hamoraonna, alai ndang diingot haroroan ni i sude sian Jahowa do. Dipaingot tangiang ni si Hanna on do, sian Jahowa do haroroan ni saluhut na adong di jolma i.
Jahowa do na manumpakhon angka silehonlehon na boi dipeop ganup jolma nionjar ni asi ni roha ni Debata jala Ibana do na manungkol hita gabe boi hot jongjong. Angka uli basa na boi tadai, holan ala ni ni silehonlehon ni Jahowa do i. Ise na mangetong dirina gogo jala sai dipingkir ndang ringkot di ibana hagogoon ni Tuhan i, sai na patoruon ni Debata do i di ngoluna.
4. Gok di Jahowa do Hangoluan dohot Hamatean (ayat 6-8)
Dipatuduhon si Hanna do partinandaanna di Jahowa, na guru di Ibana do sude na tinompaNa, mangolu nang mate. Jahowa do na mangalehon ngolu jala Ibana do na manggomgomi hamatean. Ibana do na mangalehon hosa hangoluan marhite na mangullushon hosa i tu bagasan bungbung ni igung ni si Adam, jolma na parjolo i gabe martondi na mangolu jolma i. Ibana do nang na manjou mulak jolma i marhite hamatean. Jala Ibana do na pahehehon jolma i sian hamatean tu hangoluan.
Jahowa do mambahen pogos, alai laos Jahowa do nang na mambahen mamora. Ibana paijurhon laos Ibana do muse na patimbulhon. Marhite sian i gabe lam tangkas ma si Hanna mananda Debata di ngoluna. Guru di Debata Jahowa do saluhutna ngolu ni jolma di hasiangan on. Ala ni i do ndang adong sidalian ni jolma i mandok asa ndan unduk jala satia tu Ibana.
5. Debata do Silehon Dame na Sumurung (ayat 9-10)
Sian pengalaman ni haporseaon dohot parbue ni hasatiaonna tu Jahowa naung dijalo si Hanna, dihatindanghon ibana do, Debata do na mangalehon hadameon tu angka jolma na hinaholonganNa, alai tu angka na sogo roha di Ibana diparendep do tu haholomon.
Sian on taida perbandingan cara ni Debata patandahon diriNa tu jolma na hinaholonganNa dohot tu jolma parjahat na manghasogohon Ibana. Na holong roha di Ibana nang pe di bagasan haporsuhon dohot pardangolan ibana, ditumpakhon do pasupasu, na patimpul ibana jala mambahen marhasangapon. Alai tu angka parjahat, na ginjang marroha di parendep do mambahen tu haholomon jala diipatunduk Jahowa do angka na mangalo dompak Ibana.
Kesimpulan dan Refleksi
Ndang holan si Hanna na mangadopi haporsuhon dohot pardangolan di ngolu on. Nang hita pe saleleng di tano on bolusonta do angka ragam ni hasusaan. Sipata ndang sai gira manang hatophatop Debata mangalusi dohot mangalehon na pinangido ni rohanta dohot patuduhon pangurupionNa. Alai di angka na sai tongtong mambahen Jahowa Debata haporusanna dohot pangalualuanna, sai na urupan ni Jahowa do ibana. Paluaonna do ibana sian nasa hamaolonna jala dipatimbul ibana sian haleaonna.
I do na naeng parsiajaranta sian ngolu haperseaon ni si Hanna, na marsak jala di bagasan pardangolan huhut manjalo haleaon. Alai ala Debata do hatuaonna jala partanobatoanna, dibahen i gabe diurupi jala dipasupasu ibana dohot pasupasu na mansai arga. Ala ni i aha pe na masa na boi tabolus di ngolunta manongtong ma hita manahan ro di ujungna di bagasan haporseaon na hot jala togu tu Debata Jahowa. Sai na taruli haluaon dohot tumpal hangoluan do hita muse di ujungna i. Amen.
Posting Komentar