Jamita Minggu 15 Desember 2024 Minggu Advent III tarsurat di Lukas 1 ayat 26 - 38. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Unang Ho Mabiar Ai Dapotan Asi ni Roha do Ho." Rap ma hita mangihuthon hatoranganna.
Pendahuluan
Haunduhon laho mangulahon na nidok ni Tuhan i jotjot do ndang ulaon na mura. Ala sipata olo do disuru jolma i mangulahon na asing di pamingkirion ni hajolmaon. Isarana boi do idaonta songon parsuruon ni Jahowa tu si Abraham asa mamelehon anakna si Isak. Ndang pola maol dapot roha, molo godang jolma na mangolu mangihuthon pingkiranna sandiri nang lomo ni rohana sian na mangihuthon lomo ni roha ni Debata. Alai andul do na masa na di turpuk on, dung salpu onom bulan barita taringot tu hatutubu ni si Johannes Pandidi, disuru Debata do surusuruanNa si Gabariel tu huta Nasaret. Ditongos laho manjumpangi sahalak parompuan na margoar Maria, pasahathon barita na umarga jala na umbalga panghorhonna. Sada parompuan sian pomparan ni Raja David. Surusuruan Gabariel ditongos Debata laho pasahathon tona na mansai arga di naung dipillit Debata si Maria gabe parsidohot laho patulushon sangkap ni Debata. Tung tahi na hibul sian Debata do jala na so dipengaruhi pihak na asing pamilliton i. Gabe sada keistimewaan do pamilliton i di si Maria. Sada parompuan na berstatus anak boru naung martunangan, na so marsangap di adopan ni dongan sahutana, na so mamora alai gabe parhitean ni Debata laho pasauthon sangkap hatuaon i.
Marhite si Maria ma hatutubu ni Mesias naung sinuriranghon ni angka panurirang di Padan na Robi. Dung sahat barita i tu ibana tung tarsonggot do ibana, tubu sungkunsungkun di rohana. Alai dipapos surusuruan i do ibana. Di turpuk on tapaihutihut ma songon dia do pardalanan ni parjumpaan ni surusuruan i dohot si Maria, na gabe sipahusorhusoronta di Minggu Advent na patoluhon on, dalan panomunomuonta di sada pesta na balga, i ma Natal. Pesta parningotan ari hatutubu ni Sipalua, Tuhanta Jesus Kristus.
Pembahasan
Lapatan ni pandohan "salpu onom bulan," dung onom bulan ditopot surusuruan si Sakaria/ bulan na paonomhon dung gabegabean si Elisabet. Onom bulan ma jumolo umur ni si Johannes Pandidi sian Jesus. Tontu sian sudut pandang hajolmaon ni Jesus do, ai molo sian sudut pandang hadebataon, na so marmula jala na so marujung do. Haroro ni surusuruan Gabariel manjumpangi si Maria di luat Galilea, di huta Nazaret. Huta na so sangap do huta on dipamerengon ni jolma uju i.
Molo pinamanat sian sudut pandang hajolmaon, barita harutubu ni si Johanes pandidi humebat manang sumangap do sian barita hatutubu ni Jesus. Ia hatutubu ni si Johanes Pandidi dibaritahon di bagas joro na di Jerusalem, hape Jesus dibaritahon di bagas ni si Maria di Nasaret. Hatutubu ni Johanes Pandidi dibaritahon tu malim i ma Sakaria, hape hatutubu ni Jesus dibaritahon tu parompuan na di huta na metmet. Johanes pandidi tubu di bagas ni malim i ma Sakaria, hape hatutubu ni Jesus di bara ni pinahan, jala keluarga na pogos. Hatutubu ni Johanes pandidi godang na umbotosa, hape harutubu ni Jesus hira so adong na umbotosa. Asa songon naung disuriranghon si Jesaya di Jesaya 53:2b "Ndang adong hinauli ni rupana manang hamuliaonna ... "
Alai mangihuthon mata haporseaon, tontu ndang tarbandinghon hamuliaon ni Jesus sian si Johanes Pandidi. Asa marhite sudut pandang si songon i do na laho mangajari hita sotung sudut pandang hajolmaon bahenonta laho mananda, nang manghaporseai Ibana. On ma keunikan cara ni Debata laho patuduhon hadirionNa, Debata na gabe jolma. Cara ni Debata na tung maol antusan mangihuthon pingkiran ni jolma, alai boi niantusan marhite mata ni haporseaon.
Boasa panurat Lukas pabotohon dohot unur barita parjumpaan ni surusuruan Gabariel dohot si Maria oroan ni si Josep na sian pomparan ni si David on? Tontu adong do tahina laho mangondolhon sada hubungan sian barita naung disuriranghon angka panurirang di Padan na Robi. Paboahon ia Jesus na sorang marhite parompuan na margoar Maria i, tanda hagogok ni Padan ni Tuhan i tu angka ompu nasida (patudos Lukas 3:31).
Tung songgot do rohana uju na pajumpang i ibana dohot surusuruan i. Dung didok surusuruan i "Tabi di ho na niasian! Didongani Tuhan i ma ho!" Hata "tabi" (Yunani: Chaire lapatanna bergembira; (Inggris) rejoice). Pasti do sude jolma tarsonggot molo tompu dijumpangi surusuruan, i do umbahen didok si Maria "Parsantabian dia do i ulaning?" Hatiha i, surusuruan Gabariel adop bohi tu si Maria na tongon tarsonggot rohana, alai hot ojak dope patna di tano on. Di bagasan pos ni roha ibana manungkun di bagasan rohana, mamingkirhon na pinasahat ni surusuruan i. Ndang laos so ibana di biar ni roha ala na tarsonggot i, alai adong do respon positif. Marpingkir ibana jala dilului lapatan ni tona na pinasahat ni surusuruan i. I ma gombaran ni hajolmaon manang kepribadian ni si Maria, na mansai uli jala topet ma ibana gabe ina na boi mamemehon angka na denggan tu anakna.
Di situasi hatarsonggotanna i laos didok surusuruan i "Unang ho mabiar ale Maria, ai dapotan asi ni roha do ho di Debata!" Surusuruan i mangajari si Maria asa lam marpos ni roha di na mandalani pardalanan ni ngoluna, na sipata godang na so tarduga jumpangsa. Asa molo dung songoni pos ni rohana, jumpangna ma Asi ni roha ni Tuhan i. Hataridaan ni asi ni roha i, marhite posoposo na mian di bortianna, marhite ibana ma sorang Sipalua naung dibagabagahon i. Na margoar Jesus, Ibana ma "Anak ni na Tumimbul." Di Ibana ma hagogok ni habangsa ni si David. Jesus na tinubuhon ni si Maria i ma na gabe raja ni Israel, pomparan ni si Jakob. Alai sudut pandang ni si Lukas taringot Israel, ndang sian pardagingon, alai mangihuthon spiritual/ partondion. Ala panurat Lukas sandiri ndang halak Israel, jala hasahatan barita nauli na pinasahatna pe tu angka na di ruar Israel.
Di ayat 34 tubu sungkunsungkun si Maria tu surusuruan i. Sungkunsungkun ni si Maria on mirip do tu sungkunsungkun ni si Sakaria di bindu 1:18, alai ndang sarupa argana. Didok si Sakaria "Sian dia ma tandaonhu i? Ai ahu nunga matua, dongan saripenghu pe nunga ganjang umurna." Ala ni sungkunsungkun i gabe hona uhum ibana. Ala ndang patut songon i na targoar malim, naung mamoto angka na masa di ompuna naung pinatupa ni Debata. Halongangan na pinatupa ni Debata di angka parompuan na hol, si Sarai, si Ribka dohot si Rahel. Diboto ibana do i. Alai ala so porsea si Sakaria di angka naung masa i, jala na boi do masa i di ripena si Elisabet.
Marasing do molo si Maria, ala na masa tu ibana tung so adong do tudosanna. Sada hal na istimewa do na masa na tu ibana i. Ndang mangido tanda ibana sian surusuruan i songon si Sakaria, ala ndang adong na masa di padan na robi na gabe tudosanna. Na gabe tubu di rohana "Songon dia ma pangalaho ni i, ai so adong hutanda baoa." Hata mananda (Yunani: Epei andra ou ginosko = (Inggris) Since a man not i know = hubungan intim/ seksual). Dialusi surusuruan i ma: "Songgopan ni Tondi Parbadia ma ho; ala ni i na badia do dohonon na tubu i, Anak ni Debata."
Hamamasa partubu ni boni na sian Tondi Porbadia di bortian ni si Maria, ndang adong campur tangan sian pihak na asing, nda holan sian Tondi Porbadia do. Marhite buku na badia, boi idaonta ulaon ni Tondi Porbadia na umbalga i ma pasangaphon Jesus Kristus. Tondi Porbadia pasangaphon Jesus Kristus marhite na mambahen Jesus gabe posoposo na sorang sian anak boru margoar Maria. Jesus do na gabe parmusatan ni ulaon ni Tondi Porbadia, ndang si Maria. Si Maria holan parhitean jala sahalak jolma na dapotan sangap jala dapotan pasupasu na bolon gabe ina ni Tuhan Jesus. Sarupa do songon jolma na asing hajolmaon ni si Maria. Jolma biasa do ibana, alai ibana ma na gabe songon parhitean ni sude jolma na somal tading di bagas ni natorasna, na so malim manang na so panurirang. Alai tarpilit do ibana gabe ina ni Sipalua i.
Di ayat 36 dipabotohon ia sisolhotna si Elisabet na targoar hol marhangoluan anak: jala onom bulan ma umurna di bortian. Nang pe ndang mangido tanda si Maria songon si Sakaria, alai dilehon Debata do sada tanda marhite si Elisabet. Suang songon i ma boi masa di hadirion ni si Maria. Sian na masa on boi putihonta sada parsiajaran, ia parsaoranta dohot Debata boi do gabe sada hagogoon tu dongan na asing, angka dongan sahaporseaon. Songon i ma ngolu ni hakristenonta patuduhon sada parsaoran angka na porsea i tu Debata, suang songon maradophon angka donganta. Ringkot do pajumpang si Maria dohot si Elisabet asa marsitungkolan nasida jala marsiapulan.
Di ayat 37 didok "Ai ndang adong na so tarpatupa Debata." Saluhut jolma sai adong do keterbatasanna, si Elisabet jolma na hol, si Maria ndang dope mardongan saripe. Alai nang si Elisabet dohot si Maria rap marnampuna Ama na gok huaso. Sian na masa tu na dua parompuan on, mangajari hita asa unang olo hita ala hagaleonta, gabe manundati sangkap ni Debata marhite ngolunta. Tapasahat ma sude hagaleonta i tu adopan ni Debata, asa Ibana na paturehon ngolunta.
Di ayat 38 didok si Maria "Naposo ni Tuhan i do ahu. Sai saut ma tu ahu songon na nidokmi!" Dipatuduhon si Maria do balga ni haporseaonna. Rade do ibana mangulahon songon parsuru ni Tuhan i. Haoloon ni si Maria, haundukonna tu sangkap hatuaon na sian Debata gabe sada pangalaho na patut sitiruon ni angka na porsea. Songoni ma haradeon ni ngolunta, naeng pangkeon ni Tuhan i pasauthon lomo ni rohaNa marhite parngoluonta.
Kesimpulan dan Refleksi
Barita las niroha na pinasahat ni surusuruan tu si Maria uju i, sahat do panggonghon na tu hita si saonari. Alai tung maol do sipata jolma i manjanghon barita las ni roha i, sai tartait dope jolma i laho mangihuthon dalan pingkiran na sandiri. Marhite turpuk on diajari do hita asa olo paundukhon dirinta di toru ni huaso ni Tuhan i. Asa boi sahat nang tu hita barita las ni roha na sian Tuhan i, ringkot adong hamubaon, paserephon rohanta di adopan ni Tuhan i, gabe sipangoloi jala na sai hobas mangulahon parsuru ni Tuhan i. Ai di angka pangalaho na songon i do talup jala boi hasahatan nang hasasaut ni tahi ni Debata.
Memang tu so tardodo jolma do dalan pingkiran ni Debata. Asa songon si Maria ma hita, nang pe ndang tarjalo pingkiranna alai porsea do ibana, angka na masa di pardalanan ni ngoluna ndang lingkang sian campur tangan ni Debata. Asa songon pos ni rohana i ma nang pos ni rohanta, paboa umbotoan do Tuhan i angka aha na dumenggan di ngolunta martimbanghon dirinta sandiri. Asal ma sai porsea, unduk di toru huaso ni Tuhan i jala satia mangoloi nang mangulahon na sinangkapan ni roha ni Tuhan i. Amen.
Posting Komentar