Jamita Natal I 25 Desember 2024 tarsurat di Heber 1 ayat 5 - 12. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Jesus Anak ni Debata do Sisombaon." Rap ma hita mangihuthon hatoranganna.
Pendahuluan
Andorang turpuk on, dipatorang panurat Heber hatimbulon ni Jesus martimbanghon angka Panurirang na di Padan na Robi. Di turpuk on dipatorang, Jesus do na tumimbul martimbanghon angka surusuruan. Di hata Gorik suruauruan digoar: "anggeloi" jala di hata Heber digoari "mal'akim." Lapatan ni hata na dua i: "siboan barita manang surusuruan ni Debata." Marhite nasida ma ditongos Debata tonaNa tu angka jolma.
Pangantusion na songon jotjot menganggap ia surusuruan i humebat jala umpita martimbanghon jolma. Boasa? Ala dianggap ia jolma i jotjot mangulahon na jahat alai molo surusuruan mangulahon lomo ni roha ni Debata. Laos adong muse pangantusion ia surusuruan gabe parhitean ni jolma tu Debata. Asa marhite turpuk jamita Natal on ma diondolhon ia Anak ni Debata dao tumimbul martimbanghon surusuruan. Tung na so adong do tarsurat di Buku na Badia i, ia surusuruan digoari "anak." Marhite turpuk on, Jesus do na gabe parhitean ni jolma tu Debata, jala holan Ibana do.
Borhat sian pangantusion na songon i ma, ia Jamita di Pesta Natal Parjolo on, naeng ma pasangaponta Ibana, ala olo Ibana patotoru diriNa. Debata gabe jolma tubu di bara ni pinahan di Betlehem. Marhite Ibana do digohi Padan ni Debata di Padan na Robi, Sitobus dosa ni portibi on, gabe Sipalua di hita jolma. Debata sandiri pasingkophon panobusion i, ndang marlapatan be angka pelean situtungon bahen hasesaan ni dosa songon na pinatupa ni angka malim di bagas joro.
Pembahasan
Didok di turpuk on paboa Jesus do na tumimbul martimbanghon surusuruan, alasanna: parjolo, ala haadonganna na manongtong ndang marmula jala ndang marujung, Ibana do Bonana jala Ujungna. Ibana do Alpa nang Omega, i do patuduhon hadebataonna. Paduahon, i ma haadonganna na tardok "Jolma Debata na pinatimbo, patudos Psalmen 2:7 hata ni Jahowa "AnakHu do Ho, sadarion do ho Hutubuhon." Suang songon i di 2 Samuel 7:14 didok: "Ahu gabe AmaNa, jala Ibana gabe anakHu." Sian dua ayat on dilapati paboa Ibana na lobi marmulia, jala na lobi timbo, nang pe pangantusion tipologis do ayat i. Hata na dihatahon taringot tu si Salomo di 2 Samuel, dihonahon tu Tuhan Jesus.
Mulai ayat 6 di turpuk on dipapatar aha na gabe hak-hak ni Anak ni Debata, i ma: "Na parjolo tubu i" (yang sulung). Lapatan Anak Sasadasa ni Ama i, naung adong andorang so ditompa dope portibi on jala Tuhan ni saluhut nasa na tinompa (Psalmen 89: 27). Laos Ibana hapatean jala parmulaan ni nasa na adong dung jolo ditogihon Ibana torop anak tu hasangapon (2:10). Hasangapon Anak ni Debata dipatorang marhite sian angka ayat di buku Psalmen, na pataridahon hak nang kedudukan ni Anak i martimbanghon kedudukan ni surusuruan (patudos Psalmen 97).
Surusuruan sasintongna makhluk na tinompa ni Debata, jala kedudukanna tumoru sian na manompa, i ma Jesus. Alai di hamamasa ni Natal, panurat Heber patoranghon "tumoru Anak i satongkin sian surusuruan (2:7 "Otik dipaoru Ho Ibana tu toru ni angka surusuruan). Dung pe singkop diula Anak i songon na sinuru ni Ama i, gabe "Saluhutna do dipatunduk Ho tu toru ni patNa." Ai di na pinatundukNa i saluhutna i tu Ibana, ndang adong na tading, na so unduk tu Ibana; alai anggo nuaeng, ndang tarida dope, naung tunduk tu Ibana saluhutna i.
Molo tapamanat di ayat 7 paboa angka surusuruan i boi diuba songon api na marjimburjimbur hombar tu lomo ni Panompana (patudos Psalm 104:4). On ma sada bukti ia pangantusion ni halak Israel taringot tu surusuruan i kedudukanna di toru (subordinasi) ni Jesus Kristus. Jadi i do gabe ojahan umbahen angka surusuruan i manomba Jesus Kristus. Tung tangkas do kedudukan ni surusuruan i na gabe parhobas ni Tuhan i. Parhobas na mangulahon parsuru ni Tuanna. Tuanna i, i ma Jesus Kristus na marhabangsa di habangsaNa, na ingkon pujionna, sombaonna gabe Tuhanna.
Di ayat 8 dohot udutna didok "Ro di salelenglelengna do habangsaMi, tungkot hatigoran do tungkot harajaonMi." Didok do Kristus i Debata, nang Raja na marhasangapon. Memang panurat Heber on godang do manguhal na tarsurat di buku Psalmen, isarana jotjot digombarhon ia Jesus i pomparan ni raja Daud, jala harajaonNa songon harajaon ni raja Daud, na tarbarita sahat ro di dia. Balga ni harajaon ni si Daud ala satia jala mangulahon lomo ni roha ni Debata naung mamillit ibana. Songon i ma gombaran ni harajaonNa, jala i do na godang diparsinta angka Israel di sada panghirimon di haroro ni Mesias di tongatonga nasida na paluahon nasida sian gomgoman ni na patundukhon nasida.
Pangalaho harajaon si songon on patuduhon harajaon na bonar jala na sintong, na so adong tudosanna martimbanghon harajaon na asing di portibi on. Ala gumodang do harajaon na asing i patupahon angka halumlamon, penindasan tu angka jolma na gale. Godang do harajaon na di portibi on madabu tu pangalaho pandoboan, memperkaya diri jala ndang mabiar mangulahon na so uhum. Harajaon ni Kristus sasintongna tarida hagogokna di haroroNa na paduahalihon. Molo na di portibi on harajaon ni si Daud do na boi gabe tudosanna.
Asa songon tujuan ni surat on laho paposhon roha ni siihuthon Kristus na sian horong ugamo Jahudi hian unang gale hinorhon ni borat ni panosak ni portibi on ala ni haporseaonna tu Jesus. I do umbahen godang ditaringoti angka panurirang, malim nang surusuruan di buku Heber on. Jesus do na gabe unok ni haporseaon nasida. Jesus do na gabe hagogok ni angka hata ni Panurirang di Padan na Robi. Ibana do na gabe hagogok holong ni Debata, marhite hatutubuNa di Betlehem, Debata gabe jolma.
Nunga dihamonanghon Ibana nasa jolma na saleleng on tarrante binahen ni huaso ni sibolis. Asa unang be alang jolma i sapala naung diundukhon manghaporseai Jesus gabe silua na umarga di ngoluna. Natal, i ma silua ni Debata na pinasahatNa tu jolma asa taruli di haluaon i. Ibana nama na gabe hatuaon, las ni roha jala na sai tongtong mangalehon panghirimon na mangolu di hita, asa manahan hita di ragam ni na manosak nang na mangelaela ngolunta.
Kesimpulan dan Refleksi
Di pesta Natal on diarahon surat Heber on do hita asa las rohanta manjanghon Jesus Sipalua i. Dipapos rohanta paboa ndang adong na boi mambahen ganggu rohanta di Hadebataon ni Jesus, nang pe targoar Ibana "Anak ni Debata." Memang sai adong do angka aliran ugamo na lipe di humaliangta na sai marusaha laho pasotsothon ajaranna na lipe i. Isara ni aliran Mormon na mandok ia Jesus sada sian angka Anak ni Debata na gabe Tuhan. Suang songon i aliran Saksi Jahowa na mangajarhon ia Jesus di na mamuhai haadonganNa digoari surusuruan na margoar Mikael. Angka poda na lipe on ma sipata na boi mangaliluhon haporseaon ni halak Kristen si nuaeng on.
Marhite Jamita Natal on, na marojahan sian buku Heber on boi lam tang haporseaonta, martamba nang parbinotoan taringot tu Kristologi jala ndang mura angka ianakhonta dililuhon angka parpoda na lipe i. Lam bagas panandaonta di Jesus Sipalua i, lam solhot hita tu lambungNa jala lam hibul ngolunta tapasahat na gabe pelean na mangolu tanda mauliate ni rohanta. Ibana do Tuhan na mangatasi angka tuhan na sai disomba na so siihuthon Kristus di portibi on. Alai di sada tingki ingkon unduk do nasa harajaon na adong di portibi on tu adopanNa. Ai Ibana do Anak ni Debata na marhuraja saleleng ni lelengna. Amen.
Posting Komentar