Jamita Minggu 23 Februari 2025 Minggu Sexagesima tarsurat di Mateus 5 ayat 38 - 48. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Manghaholongi Musu." Rap ma hita mangihuthon hatoranganna.
Pendahuluan
Di ngolunta si ganup ari, tontu hea do tahilala hansit rohanta, dijehehon, manang dihasogohon halak hita. Alai, di tongatonga ni saluhutna i, dijou Jesus do hita asa mangulahon na asing, i ma manghaholongi angka na mambahen hansit rohanta, manangianghon angka musunta. Na gabe sungkunsungkun, boha do hita siihuthon Kristus manghangoluhon angka poda i di ngolunta si ganup ari? Songon dia do hita boi manghaholongi halak na mambahen hansit rohanta sian roha na bagas jala tulus? Boha do hita asa unang mangalului pamaloson, jala baliksa patuduhon asi ni roha? Turpuk on dienet sian Mateus 5:38-48, sada turpuk Jamita na mansai ringkot sian Jamita di dolok na pinasahat ni Tuhan Jesus tu angka siseanNa dohot tu na torop na manangihon Ibana. Jamita di dolok i ndang holan pangajarion moral, alai dohot do ojahan Teologis tu angka siihuthon Jesus na naeng manghangoluhon angka nilai-nilai ni Harajaon ni Debata. Di poda on, Jesus menentang pandangan dohot norma-norma sosial na berlaku di zamanNa, tarmasuk konsep keadilan dohot dendam. Portibi di tingki ni Jesus, songon portibita si nuaeng on, jotjot do ditanda marhite prinsip dendam, hosom dohot uhuman. Sada sian patik na mansai tarbarita hatiha i, i ma patik pamaloson na tarbarita songon "mata do abul ni mata, ipon do abul ni ipon."
Pembahasan
Di partingkian ni Jesus, masyarakat Jahudi dohot Romawi mangolu di bagasan tatanan sosial na mangondolhon hasangapon dohot pamaloson. Mangihuthon budaya Jahudi, patik "mata do abul ni mata, ipon do abul ni ipon" (patudos 2 Musa 21:24, 3 Musa 24:20) diadopsi do i songon sada bentuk keadilan, pembalasan na martujuan laho pasidinghon pamaloson na marlobilobi. Undang-undang on mambatasi balga ni pamaloson, na mamastihon asa holan uhuman na hombar tu hasalaan i do dijalo halak na hona na hansit i. Alai, nang pe songon na adil idaon patik on, tong do membentuk pola pikir na berpusat tu keadilan transaksional, di na ingkon jaloon ni na marsala i do pamaloson na sebanding. Di praktekna, uhum on sasintongna patoguhon siklus dendam, di na manghilala korban berhak mandapot ganti rugi sian pelaku. Prinsip on mansai marlaku di tongatonga ni masyarakat, bagas marurat di budaya ni halak Jahudi hatiha i.
Di sisi na asing, di budaya Rom mansai timbo do arga ni hasangapaon manang harga diri. Hasangapon ni sasahalak marpardomuan do i tu harga diri dohot kedudukanna di masyarakat. Molo adong na manghilala naung mago bohina manang naung lea, disi ma dihilala ibana ringkot ni membela manang paulakhon hasangaponna. Mansai ringkot do hasangapon, pola do manang aha pe panginsahion ingkon alusan marhite pambahenan laho paulakhon hasangapon ni sasahalak. Mamastap hurum siamun ni sasahalak rupani, ndang holan ulaon pardagingon, alai dohot do i songon na mangaleai hasangapon ni halak i. Gariada tahe, mamastap hurum hambirang marhite pudi ni tangan, i ma sada ulaon na dao lumea, ala di konteks masyarakat Rom, i ma sada metode na dipangke laho maradophon hatoban manang halak na dianggap tumoru manang terendah. Jadi, alus tu panginsahion di budaya Rom sai manghorhon tu usaha laho mampartahanhon manang paulakhon harga diri.
Di tingki Jesus pasahathon pangajarionNa di Mateus 5: 38-48 on, manghatai do Ibana tu masyarakat naung somal di angka norma-norma i. Tangkas do diboto Jesus, ia konsep "mata balos mata" nunga marurat di roha ni torop jolma, baik di budaya Jahudi dohot Rom. Hombar tusi do ro Jesus laho paturehon norma sosial on marhite na mangalehon sada perspektif na imbaru. Didok Jesus, "Molo adong na mamastap hurummu siamun, tarehon ma nang hurummu si hambirang" (Mateus 5:39), ndang na naeng mandok asa sip hita jala tapasombu masa na so denggan i. Baliksa, na mangarahon hita do asa patupahon sikap na uli, i ma tindakan penyerahan diri tu adopan ni Debata. Di pangajarionNa, dipauba Jesus do pola pikir na marpusat tu pamaloson, gabe tu pola pikir na berpusat tu holong dohot hasesaan ni dosa.
Manghaholongi musu di bagasan konteks on ndang taringot tu hagaleon manang na so margogo, alai taringot tu hagogoon partondion na mambahen hita boi manadinghon hakta laho mambalos jala mangalehon inganan tu holong ni roha ni Debata laho mangula. Molo adong na mamastap hita di hurum siamun, reaksi wajar ni jolma boi do mambalos marhite muruk manang tindakan na sarupa. Alai, dijou Jesus do hita asa unang tarjebak di siklus hosom dohot pamaloson. Jala pabalikhon hurum na sada nari ndang na mandok na paloashon dirinta torus hansit, baliksa sada tindakan na patuduhon na so tunduk hita tu logika kekerasan ni portibi on. Tapillit do pasahathon hakta i ada Debata na mamalosho, jala marhite i, malua ma dirinta sian hosom.
Di bagasan konteks sosial dohot budaya di partingkian ni Jesus, songon na mansai andul do pangajarion on. Masyarakat nunga somal di siklus kekerasan dohot hasangapon na ingkon dijaga marhite pambaloson na marragam. Alai, dipatudu Jesus do Harajaon ni Debata ndang songon ulaon ni portibi on. Harajaon ni Debata ndang di bangun di atas dendam, alai di atas ojahan holong na melampaui logika ni hajolmaon. Manghaholongi musu marlapatan do i mangihuthon bogas ni Debata parasi roha i. Songon na nidok ni Jesus di Mateus 5:45, "ai molo songon i ma hamu gabe anak ni Amamuna na di banua ginjang i." Marhite na manghaholongi musunta, patuduhon na anak ni Debata do hita na mangantusi jala manghangoluhon holongNa. Manghaholongi musunta pe mangajarhon tu hita ringkot ni serep ni roha. Di portibi na patujolohon martabat dohot harga diri, diajak do hita asa patutoru diri, ndang di jolo ni jolma, alai di jolo ni Debata. Jesus sandiri do na mangalehon sitiruon na sumurung taringot tusi. Ibana, na so mardosa, olo tarsilang laho manesa dosanta. Ndang dibaloshon Ibana uju diinsahi, disiksa jala direhei, alai dipillit do manesa dosa ni angka na manghansiti Ibana. On ma sada rumang ni holong na melampaui sude logika ni jolma na naeng siulahononta.
Poda ni Jesus tongtong do relevan di ngolunta di tingki on. Di portibi na jotjot gok parbadaan, parbolatbolaton dohot parbadaan, tarjou do hita gabe sitindangi di holong ni roha ni Debata. Songon halak na porsea hita, dijou do hita manghangoluhon joujou on, ndang holan marhite hata, alai dohot do marhite pambahenan na konkrit. Dijou do hita asa manghaholongi, nang tu angka na mansai maol tahaholongi manang tu angka musu pe. Ala, marhite na manghaholongi musunta i, tapataridahon ma holong ni Debata na so hadodoan, holong na paubahon portibi on.
Secara retoris, dipangke Jesus do metafora mamastap hurum on laho menantang konsep huaso dohot hasangapon. Di portibi na dianggap gogo dohot huaso ni pamatang songon simbol ni huaso, dibalikhon Jesus do prinsip on marhite na patuduhon hagogoon na sasintongna, i ma di pengorbanan diri dohot holong na so marhasohotan. Di huria di hatiha i, pangajarion na menentang adat sosial naung bagas marurat do on, ala ro Jesus mangalehon tiruan marhite ngolu dohot pengorbananNa. Ibana do Debata na mambuat rupa ni jolma jala na olo paserephon diriNa sahat tu na mate di hau pinarsilang. Di na tarsilang i Ibana, ndang dialusi Jesus reherehe, pastappasta, nang angka tijur na ro tu Ibana. Gariada tahe, disesa do angka na mamparsilangkon Ibana, sada tiruan na luar biasa taringot tu holong na so marala, holong na ias.
Kesimpulan dan Refleksi
Di hita na mangolu di portibi on, tongtong do relevan poda on jala gabe sada tantangan na balga. Hita mangolu di era na jotjot masa parbadaan, parbolatbolatan dohot parmusuon, baik di parsaoran pribadi, di keluarga, nang di tingkat sosial na umbalga. Tema na pinatolhas ni Jesus di Mateus 5:38-48 on ndada holan berlaku di konteks hubungan pribadi, alai dohot do mencakup berbagai konteks sosial dohot masyarakat. Di portibi on na jotjot marbadai di lingkungan keluarga, di inganan parkarejoan, bahkan di skala na umbalga, isara na politik. Alai, songon siihuthon Kristus hita, tarjou do hita manghangoluhon ngolu na patuduhon holong ni roha ni Debata. Marhite turpuk on, lam bagas do tarimangi aha do lapatan ni manghaholongi musu, boha do hita boi mangulahon poda ni Jesus on tu ngolunta, jala boha do marhite pambahenan holong dohot hasesaan ni dosa, boi hita gabe sitindangi na mangolu di portibi na gok hosom.
Holong na tulus do na paluahon hita sian hosom dohot pamaloson. Molo tahaholongi, tabahen do ruang di rohanta na so boi tubu parmusuon. Songon api na mintop molo so adong bahan bakarna, mate do hosom i molo so talehon ingananna di bagasan rohanta. Marhite na manghaholongi, secara prinsip sasintongna tapadao do konsep "musu" sian dirinta sandiri. Molo tung pe adong halak na merasa marmusu tu hita, ndang be idaonta nasida sian parnidaan na sarupa. Gariada tahe, idaonta ma nasida songon jolma na tama haholongan, songon hita naung manjalo holong ni Debata na so suda i. Angkup ni i, manghaholongi musu, i ma sada ulaon na lobi sian panghilalaanta sandiri. On ma sada pambahenan na marojahan tu holong ni roha ni Debata, na jumolo manghaholongi hita nang pe pardosa hita.
Manghaholongi musu ndang na mandok asa gabe ndang tapardulihon hasusaan manang ketidakadilan, alai sada joujou do i tu hita asa pasahathon saluhutna tu Debata jala mamillit dalan holong na so pola marala. Jesus sandiri do na mangalehon tiruan on marhite na di parsilanghon Ibana. Manghaholongi musunta laos marlapatan do i manesa hasalaan ni angka halak na mambahen hasalaan tu hita, jala boi do gabe sada sian ulaon na mansai maol siulahononta. Alai molo manatap hita tu Jesus, na olo tarsilang humophop hita, nang pe so mardosa Ibana, ditogihon do hita mangihuthon bogasNa. Diajarhon Jesus do tu hita, ia holong na sintong i ma holong na olo berkorban jala manahan di insakinsak asa boi mamboan hatiuron ni Debata tu portibi na di bagasan haholomon. Amen.
Posting Komentar