Jamita Partangiangan Epistel Minggu 23 Februari 2025 Minggu Sexagesima tarsurat di buku Psalmen 37 ayat 1 - 11. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Manghaholongi Musu." Rap ma hita mangihuthon hatoranganna.
Pendahuluan
Adong sada pandohan na mandok songon on: "Biarpun kebohongan dan kejahatan berlari secepat kilat, namun suatu waktu kebenaran akan menghampiri dan mengalahkanya." Olo do di bagasan ngolu si ganup ari merasa hita sai hira na so adong keadilan. Godang do taida marhite media cetak nang media elektronik angka halak na mora manang pejabat na mangulahon korupsi alai manjalo perlakukan khusus do nasida dalam proses penegakan hukum. Olo do muse taida angka halak na so pola mangharingkothon ngoluna manang ndang parduli di angka parsiajaran uju singkola, godang angka pangalaho na so ture diula, alai gabe dumenggan do sipata ngoluna sian angka nа umburju. Olo muse do dumenggan nilai ni halak na so hea marsiajar uju ujian marimbanghon halak naung berusaha marsiajar, holan ala ni na mancontek, jala lan dope angka na asing. Na gabe sungkunsungkun, songon dia do hita bersikap jala berpandangan taringot tu angka situasi na songon on? Marhite turpuk on, naeng marsiajar hita sian pengalaman ngolu ni sahalak Parpsalmen i ma Raja Daud.
Pembahasan
Buku Psalmen on i ma sada buku na secara jujur mamaritahon pengalaman iman ni sasahalak dohot Debata nang pe di bagasan arsak nang las ni roha. Sahalak na margoar si Daud i ma na manggurithon Buku Psalmen on jala marhadomuan do saluhut angka pengalaman iman ni ibana i tu parngoluon ni jolma si ganup ari. Marhite turpuk on, parpsalmen, Raja Daud naeng mangarahon jolma taringot tu sikap uju mangadopi angka parjahat dohot angka siula hajungkingon. Diarahon do asa unang gabe mohop ateate manang muruk mangida angka siula hajahaton, huhut asa unang mangiburu mangida angka siula hajungkingon. Baliksa, asa lam papitahon ngolu asa unang sarombang dohot angka parjahat jala siula hajungkingon i, alai asa lam marhaposan tu jahowa (ayat 1, 3).
Mansai tangkas do dirajumi parpsalmen on i ma ringkot ni manjamothon hadameon dohot halambohon ni roha na patubuhon angka las ni roha. Ala halak na mangolu di bagasan hajahaton dohot parroha na jungking songon tumbur ni duhutduhut na malos do nasida. Jala ndang adong gunana molo gabe muruk manang mangapian hita marnida ngolu ni angka parjahat nang siula hajungkingon manang kecurangan (ayat 2). Hombar tusi do asa tajamothon roha na manghalomohon Jahowa na mangalehon di hita angka na pinangido ni rohanta hombar tu lomo ni roha ni Jahowa, ndang lomo ni rohanta (ayat 4). Molo tataringoti "pangiburuon" tung mansai jotjot do tubu di bagasan ngolu ni jolma si ganup ari. Adong do pandohan na mandok "Halak do na manuhor kulkas alai hita gabe ngalian," na marlapatan do i, bahwa di bagasan ngolu on olo do hita mangapian di kesuksesan ni halak sementara ndang taboto songon dia usaha nasida laho mencapai sesuatu. Jadi ringkot situtu manjamothon roha asa ganup ari tubu las ni roha.
Naeng ma tong rajumanta paboa ngolu na marhasonangan songon na hinangoluhon ni parpslamen on i ma, molo manongtong hita marhaposan tu Jahowa. Ganup ma nian hita mangarahon ngolunta tu angka ulaon lomo ni roha ni Debata marimbanghon ngolu na membandingkan dirinta dohot halak na asing. Tarlumobi ma molo mangadopi angka parjahat hita di ngolu on unang ma gabe terganggu dame ni rohanta.
Dihalomohon Jahowa do hita asa uang gabe sarombang dohot portibi on, alai asa gabe imbaru ma hita marhite hamubaon ni roha, asa tau hita manimbangi lomo ni roha ni Debata (patudos Rom 12:2). Sada pandohan sian Paus Fransiskus mandok, "Sejahat-jahatnya orang kepadamu, berjanjilah pada dirimu, bahwa kamu akan tetap menjadi orang baik."
Kesimpulan dan Refleksi
Godang do jolma kecewa martuhan ala tubu pangapianon mamerang ngolu ni halak, alai anggo angka na porsea, marhaposan do rohana tu Jahowa, uju susa pe ngoluna manang sonang, ai Jahowa do mual ni las ni rohana. Uju mangadopi angka halak parjahat dohot siula hajungkingon hita, unang ma madabu hita tu mohop ni ateate manang uju mangadopi angka jolma na jungking hita unang ma gabe mangiburu hita. Amen.
Posting Komentar