Jamita Partangiangan Epistel Minggu 2 Maret 2025 Minggu Estomihi tarsurat di buku 2 Korint 3 ayat 12 - 4 ayat 2. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Papatarhon Sondang Hamuliaon ni Debata." Rap ma hita mangihuthon hatoranganna.
Pendahuluan
Dipatorang Apostel Paulus do taringot tu hadirion dohot angka panghobasionna na so maniru si Musa di Padan na Robi (2 Musa 34:30, 34-35). Di na dihuphupi si Musa bohina, ala mabiar bangso i manjumpangi ibana. Di bagasan biar ni roha ni bangso Israel pajumpang dohot ibana ala patuduhon hamuliaon ni Jahowa bohi ni si Musa. Jala, maksud ni si Paulus laho patigorhon roha/pangantusion ni halak Korint do, ala dianggapnasida do hira kebenaran na mutlak na masa di si Musa.
Sian i tarida do, pengaruh-pengaruh na robi tong mangolu di bagasan parngoluon nang songon i hadirion ni halak Kristen na adong di Korint. Ala ni i do, Apostel Paulus laho pasintonghon pangantusionnasida, asa unang terjebak di angka fenomena naung salpu, hape nunga mangolu di bagasan haimbaruon na sian Kristus i. Sungkunsungkun na muncul sian turpuk ojahan ni Epistel on, jala boi gabe mutiha di haporseaonta, i ma: 1) Huaso sian dia do na mambahen si Paulus tolap paingothon halak Korint? 2) Aha do na mambahen Apostel Paulus barani patupahon hatorangan tu huta Korint on umbahen tolapna membandingkon dohot si Musa? 3) Songon dia do hita patuduhon rupa ni Kristus di partingkian si nuaeng on?
Pembahasan
Marhiras ni Roha di Bagasan Kristus, Laho Pasohothon na Tartutup i (ayat 12-15).
Dipatuduhon Apostel Paulus do hiras ni rohana tu halak Korint, laos sian i hataridaan ni hatandianna dohot si Musa. Ala selalu berpatokan tu si Musa, gabe lupa nasida na Kristus do ujung ni patik laho mamintori nasa na porsea (Rom 10:4). Dihirim Debata do marhite si Paulus, asa ndada tinggal di bagasan i. Alai, di bagasan hiras ni roha tu Kristus ma nian. I do umbahen didok Paulus, ndada si Musa naeng tiuronna, alai Kristus naung paluahon sian dosa i do. Ai ndang adong na huphup di bagasan Ibana di Debata, patar do sudena.
Memang, jotjot do angka perbandingan dibahen jolma, taringot tu angka naung salpu. Isarana marhite pandohan: "Uju hami ndang hea masa songon i. Unang sae dibahen angka na so hea masa." Ingkon tarbuka do pingkiranta tu angka haimbaruon di hamajuon ni zaman on, alai ingkon bisuk do hita mamereng angka i sude, apakah bertentangan dohot Hata ni Debata manang ndang. Asa di bagasan habisukon mamereng angka haimbaruon. Ai konsep na binoan ni si Paulus, sada haimbaruon do i tingki i, jala haimbaruon na binoanna tingki i, ndada maralo tu Hata ni Debata. Memakai yang baru, tidak harus meninggalkan yang lama, tetapi memodifikasinya, supaya hidup dalam kebaruan yang sesuai dengan firman Tuhan. I do tong hataridaan hiras ni roha di bagasan Kristus, laho pasohothon na tartutup.
Tuhan Sandiri do Mambuat Panghuphupi i, Laos PaubaonNa do Hita (ayat 16-18).
Dipatorang si Paulus do, na Tuhan do mambuat panghuphupi i. Jala, udutanna mandok Tuhan do Tondi i, jala paubaonNa hita. Hira sosososo do on tu halak Korint asa mangolu di bagasan parngoluon hakristenon. I do umbahen dipatorang si Paulus ise do Tuhan, ise do hita di adopan ni Tuhan (ayat 18). Tudos do hita tu rupaNa (1 Musa 1:27), manang di hata na asing didok: Imago Dei (gambar Allah). On do sihangoluhononta di haporseaonta. Molo tahangoluhon do i, ingkon di bagasan hamubaon do hita, ai nunga dipauba Ibana hita. Aha ma contohna? Boi do idaonta humaliang sebagai Imago Dei. Molo tarajumi do na ditompa hita tudos tu rupaNa, songon i nang donganta (Imago Dei), ingkon boi do membongkar angka sekat-sekat na mangambati hita. Marhite i, tontu lam marsangap ma goar ni Tuhan i.
Papatarhon Hasintongan Ala Naung Manjalo Ulaon ni Tuhan i (Tohonan).
Tung di bagasan haporseaon na marsitutu do Apostel Paulus manghatahon i tu halak Kristen na adong di luat Korint. Ala, marhite anak ni Debata na mate, jala hehe, i ma Jesus Kristus, ndang adong be na buni dibahen Ibana, lumobi ma haluaon i. Jala, ndada marakal si Paulus patupahon uloan tohonanna i, bulus do ibana mangula ulaonna, marhite na papatarhon hasintongan na sian Tuhan i. I do umbahen tandaon ni roha ni saluhut jolma ibana, ala di pamikirion ni jolma uju i, manghalomohon na buni/huphup, jala marhite i ndang boi idaonna hasangapon ni Tuhan di bagasan Tondi i.
Molo taida di parhuriaonta nuaeng adong do pigapiga tohonan, i ma: Pandita, Guru Huria, Diakones, Bibelvrouw, Evangelis nang Sintua. Alai boi do tapabagas pangalapationta taringot tu 'tohonan,' i ma angka ulaonta si ganup ari. Lumobi marhite 1 Petrus 2:9. Ala ni i, di ragam ni ulaonta, ingkon do pinapatar hasintongan. Molo borat, urupanNa do hita laho mangulahon. Contoh: Molo sebagai natoras, unang ala ni godang ni ulaon si ganup ari (repot), ronsot ni angka ulaon, gabe tatabunihon Hata ni Debata tu ianakhon, marhite na so mangalehon poda. Ingkon do pinasahat Hata ni Debata/poda.
Kesimpulan dan Refleksi
1. Molo taingot pardalanan ni sejarah ni hurianta HKI. Barani do Soetan Malu menentang Missionaris/ si bontar mata marhite hata ni Debata di Jakobus 2:17, ala sai dihuphupi Missionaris do uju i halak Batak ndang boi pajongjong huria, asing ni naung adong jala naung terpusat di sada inganan. Jala ndang piga halak Batak na dilibathon manang na dipangke gabe parhobas di huria. Sai diutamahon nasida do na manghobasi/ menjabat di huria, angka si bontar mata. Hape ro ma Soetan Malu, na sihol rohana manghobasi jala pahembanghon huria i. I do asa dipajongjong ibana huria di Pantoan, Batu Opat, na digoari uju i, HChB, na gabe HKI. Lapatanna, ingkon boi do hangoluhononta marhite turpuk on, huria HKI ditulak do angka na buni, na manghuphupi, ala nunga dipapatar Kristus huriaNa, HKI. Ala ni i, manang di dia pe hita, unang tahuphupi na HKI hita. Songon hata ni endenta i (mars HKI) na mandok "Las Roham O HKI."
2. Ala naung dipasahat Debata tohonan i tu hita marhite ragam ni uloanta, ingkon papatarhononta do hasintongan ni Debata, une manang so une tingkina (ida 2 Timoteus 4:2).
3. Di partingkian si nuaeng, lam marusaha do humaliangta mambahen buni hasintongan ni Debata. Ala ni i, ingkon tatulak do angka si songon i, marhite na tapaingot jala tapature, ala tahangoluhon do na ditompa hita tudos tu rupa ni Debata (Imago Dei).
4. Epistel Minggu Estomihi on, paingothon hita molo pe borat na taadopi laho papatarhon hasintongan ni Debata, alai margogo ma hita. Ala Ibana do partanobatoanta. UlaonNa do na taulahon, ndada ulaon ni hajolmaon laho papatarhon hasintongan. Amen.
Posting Komentar