Jamita Minggu 18 Mei 2025 Minggu Kantate tarsurat di Ulaon ni Apostel 11 ayat 1 - 18. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Dibasabasahon Debata do Hamubaon ni Roha." Rap ma hita mangihuthon hatoranganna.
Pendahuluan
Buku Ulaon ni Apostel masuk ma tu horong Padan na Imbaru, buku palimahon, buku on mancaritahon songon dia mula ni hajongjongan ni Huria i jala songon dia ragam ni parsoalan na niadopan ni Huria di na marbarita na uli. Panurat buku on margoar si Lukas i ma panurat ni Evangelium Lukas, molo angka pakar Padan na Imbaru mandok buku Ulaon ni Apostel on kelanjutan ni Evangelium Lukas.
Pembahasan
Di ayat 1-3 dipatorang ia hakristenon tubu di tongatonga ni halak Jahudi, jala sampulu dua sisean ni Tuhan Jesus manang angka Apostel i sude halak Jahudi, jala peristiwa Pentakosta na gabe ari hajongjongan ni Huria i pe masa di Jerusalem di luat ni halak Jahudi, jala na gabe ruas ni Huria i pe parjolo sahali halak Jahudi do. Jala dung jongjong Huria i, Barita na Uli dipararat tu halak Jahudi di luat Jahudi, jala Huria na parjolo i pe patupahon parmingguonna tu sinagoge ni halak Jahudi, sahalisahali di bagas joro ni Debata di Jerusalem, jala halak Kristen na parjolo i na terdiri sian halak Jahudi i, nang pe nasida porsea tu Jesus alai tongtong do mangulahon adat parugamoon Jahudi, asa i do didok Huria na parjolo i gabe bidat ugamo halak Jahudi.
Di halak Jahudi adong do adat parugamoon na margoar partikularisme na mangajarhon so jadi halak Jahudi marsaor tu halak si pele begu (non-Jahudi), ala dietong halak Jahudi holan nasida do bangso na mananda Debata, na asingna i bangso sisomba ganaganaan. Alai dung diboto halak Jahudi marasing do hape ajaran ni Kristen dohot nasida, molo Kristen mangaku Jesus do Debata, sementara di halak Jahudi, Jesus na mangaleai Debata do, asa i do diparsilanghon.
Gabe dilelei halak Jahudi ma sude halak Kristen di luat Palestina, gabe marserak ma halak Kristen sahat tu luat ni halak non Jahudi. Alai hea do Apostel Petrus, i ma uluan ni halak Kristen parjolo laho tu Kaisarea di Italia, luat halak non Jahudi tu jabu ni na margoar Kornelius, sahalak non Jahudi, laos dibaritahon Apostel i Barita na Uli gabe porsea nasida laos dididi, laos disi do apostel i marborgin (Ulaon ni Apostel 10 : 1 - 33). Na humebat na gabe gumodang manang maratus hali lompit godangna halak na porsea tu Jesus di luat non Jahudi sian di luat Jahudi i sandiri, umbege i gabe muruk ma halak Kristen Jahudi, gabe dibadai nasida ma Apostel Petrus, ala dietong nasida Apostel Petrus nunga manalai adat parugamoon Jahudi, i ma marsaor dohot halak na so Jahudi. On ma bahayana molo talapati Jesus secara privatisasi, sai hira holan tu sada kelompok sambing dietong haluaon na binoan ni Jesus i, nang pe sasintongna haluaon ni Jesus bersifat universal, i ma tu sude bangso.
Di ayat 4-17 patoranghon pembelaan ni Apostel Petrus dalan laho mempertangungjawabhon parbaritaan na uli dohot pandidion na dibahen nasida tu si Kornelius sahalak non Jahudi jala di huta ni halak non Jahudi. Dipatorang Apostel Petrus ma ndada sian roharohana sandiri patupahon i, tung ala ni parsuruon ni Debata do, pola ro sada parnidaan tingki di Jope ibana, i ma parnidaan na sian banua ginjang marhite sada abit na maropat suhi na marisi nasa pahanpahanan na ramun hombar tu adat parugamoon ni Jahudi, jala pola tolu hali ro soara ni Debata na mandok unang dok ramun nasa na naung niiasan ni Debata. Jala dihatinghon Apostel Petrus hapatean ni parnidaan i ro tolu halak non Jahudi mangalap ibana laho tu jabu Perwira Italia na margoar Kornelius sahalak non Jahudi jala di luat non Jahudi. Jala Tondi ni Debata marsoara dibagasan pangora ni tondina na so jadi ibana ganggu laho rap dohot nasida.
Dung sahat nasida di jabu i laos dihatindanghon si Kornelius di tingki martangiang ibana, diida ibana jongjong surusuran ni Debata ma mandok tu ibana asa disuru naposona tu Joppe laho mangalap sahalak naposo ni Debata na margoar Petrus, asa dihatahon tu ibana angka barita haluaon tu sandok jabuna. Umbege i gabe marjamita ma Apostel Petrus tu nasida, songgop ma Tondi Porbadia tu sandok pangisi ni jabu i, gabe tubu ma di roha ni si Petrus, gari Debata nunga mandidihon nasida di bagasan Tondi, tung aha ma ahu laho mangambati nasida asa tardidi di bagasan aek, laos dididi si Pertus ma nasida saluhutna. Aha na boi tabuat sian turpuk on, on do: Alat ukur na ias manang na ramun ndada adat manang tradisi parugamoan ni jolma alai sangkap ni Debata do, ala ni i dang jadi hita halak Kristen laho pahebathebaton diri laos patutoruhon jolma na asing ala ismeta tu adat parugamoan ni hajolmaonta.
Di ayat 18 dipatorang, dung dipaboa Apostel Petrus sude na masa i gabe hohom be nasida sude angka halak Jahudi na porsea, laos dipuji nasida ma Debata siala sadar be nasida, ai dohot do ditogihon Debata halak si pebele begu tu hambubaon ni roha asa mangolu nasida. Sikap isme manang fanatik sempit i ma bukti ndang dope sahat hita tu kesadaran partondion, isme manang fanatik sempit i ma pangalaho na membedabedahon jolma manang istilah di hita politik identitas, i ma bukti paragumaonta nionjar ni adat hajolmaonta do ndada dionjar siala pangantusionta tu sangkap manang lomo ni roha ni Debata.
Kesimpulan dan Refleksi
Ondolan ni Jamitanta di turpuk on i ma dibasabasahon Debata do hamubaon ni roha, tangkas dipatorang turpuk on ia molo jolma siida rupa do alai molo Debata siida roha na di bagasan do. Antong tatiru ma Debata unang ma siida rupa parugamaonta, asa boi hita marsaor tu saluhut halak asa marhitehite parsaoranta na denggan i atik boi nasida gabe taruli tu haluaon na binoan ni Jesus songon si Kornelius. Tangkas dipaboa turpuk on, songon dia pe burjuna jolma molo so dibege Barita na Uli asa ditanda Jesus, marisuang do i sude.
Ingkon parjolo do dibege jolma i Jamita manang Hata ni Debata, dung i dipasupasu Debata ma Jamita i laos gabe tubu ma hamubaon ni roha tu na umbegesa songon na binahen ni Apostel Petrus tu si Kornelius. Alai boha ma carana sahat Barita na Uli tu halak na asing manang halak sileban, molo hita sandiri pe manghasogohon manang manghagigihon halak sileban i. Tontu dijou jala ditogutogu turpuk on do hita asa denggan ma hita marsaor tu sude halak, unang tatiru panglaho adat parugamaon partikularisme Jahudi i, ai marhitehite parsaoranta na dengan i do dalan di hita marbarita na uli tu nasida, dipasupasu Debata gabe porsea jala gabe marhamubaon ni roha ibana.
Laos di hita halak Kristen pe, gok do na asal Kristen alai parngoluonna haportibion lobilobi sian halak si pele begu. Molo masihol hita asa marhabumaon ni roha ibana, tongtong jala manongtong ma baritahon, hatahon, podahon, ajarhon, angka Hata ni Debata tu nasida. Siala holan ala ni umbege Hata ni Debata do jolma i boi marhamubaon ni roha. Amen.
Posting Komentar