Jamita Partangiangan Epistel Minggu 25 Mei 2025 Minggu Rogate tarsurat di buku Ulaon ni Apostel 16 ayat 19 - 34. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Tangiang tu Hademakon." Rap ma hita mangihuthon hatoranganna.
Pendahuluan
Hataridaan ni huaso ni Jesus Kristus patar do boi idaonta sian angka na masa di angka pardalanan ni Apostel na tinongos ni Kristus laho pajongjonghon harajaon ni Debata marhite angka hajongjongan ni Huria na parjolo i. Tarlumobi molo tapamanat di buku ni Ulaon ni Apostel on. Buku Ulaon ni Apostel i ma na papatarhon hajongjongan ni Huria na parjolo i jala songon dia barita ni Kristus dipararat angka Apostel dung hamamasa ni Pentakosta. Buku Ulaon ni Apostel i ma na ginurithon ni si Lukas i ma aleale ni si Paulus (Lukas 1 : 1 - 4; Ulaon ni Apostel 1 : 1 - 3). Digurithon do di buku on misi ni Apostel Paulus, sian misi na parjolo (Ulaon ni Apostel 13 : 1 - 14 : 28), Misi Paulus na paduahon (Ulaon ni Apostel 15 : 36; 18 : 22), dohot misi ni Paulus na patoluhon (Ulaon ni Apostel 18 : 23 - 21 : 17). Tujuan Misi ni apostel Paulus i ma pahembanghon barita taringot Jesus Kristus sian Jerusalem sahat tu Rom, bahkan tu liat portibi on.
Di Ulaon ni Apostel on, tarida do ulaon ni Kristus si palua i marhite silehonlehon ni Tondi Porbadia. Di na pararathon Barita na Uli i angka Apostel, ditiop angka Apostel i do gomos, huaso ni tangiang na mangajari angka Apostel i laho marbarita na uli di tingki i. Songon i nang Apostel Paulus na sai tongtong porsea tu hagogoon ni na martangiang asa dapot hagogoon dohot hasonangan di pangaramotion ni Jesus Kristus di tingki marbarita na uli. Di turpuk on, boi do idaonta songon dia si Paulus dohot Silas di tingki tarhurung nasida. Ndang muruk nasida jala mangarehei. Baliksa, marhite tangiang i, dipasahat nasida do ngolunasida dohot pardalananna tu Jesus Kristus. Jala manghorhon na denggan do tangiang i di pardalanan ni si Paulus dohot Silas, tarlumobi di na laho pararathon Barita na Uli.
Pembahasan
Paulus dohot Silas di Hurungan (ayat 19 - 24)
Hirim do roha ni Apostel Paulus na ingkon sahat Barita na Uli tu liat portibi on. Dihilala Apostel Paulus do panjouonna laho mamaritahon Jesus Kristus. Ai dihilala Apostel Paulus ndang tau ibana mangulahon i sahalakna molo so adong na mandongani jala mangurupi ibana, isarana si Silas, Barnabas, dohot si Judas Barabas, dohot na asing. Di Ulaon ni Apostel 16 : 19 - 34, Paulus dohot dongan saulaonna si Silas (na manguluhon Huria di Jerusalem) marbarita na uli di luat Pilippi i ma sada huta di luat Makedonia. Di tingki sahat nasida di Pilippi, mardalan ma nasida di topi ni batang aek jala jumpang nasida ma disi inganan partangiangan (Sinagoge). Jala mansai torop do angka boruboru jumpang nasida disi, jala marjamita Apostel Paulus. Jala jumpang nasida ma disi sahalak boruboru na margoar si Lidia partigatiga abit hasumba sian huta Tiatira. Mansai lomo do rohana mambege Jamita ni Apostel Paulus, jala dibuhai Tuhan ma rohana di tingki na marjamita i Apostel Paulus, jala rade ma ibana nang nasa bagasna tardidi jala porsea tu Jesus Kristus.
Jala ndang holan si Lidia na rade tardidi jala porsea tu Jesus. Di tingki di inganan partangiangan i, jumpang nasida do sada naposo boruboru pangarunding (dirasuki roh tenung/ peramal). Jala godang do laba ni induk somangna sian pangarundinganna i (ayat 16). Torop do halak ro manungkun tu ibana, jala mansai ringkot do naposo boruboru i. Didok di tingki on songon sahalak na boi mangalehon "pesugihan". Di tingki di Sinagoge i Apostel Paulus, dipaihutihut boruboru i ma ibana, huhut manjoujou. Ala sogo panghilalaan ni Apostel Paulus di pambahenan ni boruboru i, diparuar Apostel Paulus ma tondi na hodar sian boruboru i, jadi ruar ma tondi na hodar di na satongkin i (ayat 18).
Marhite Apostel Paulus dipapatar Jesus Kristus do huasoNa tu tondi na hodar. Jala songon di inganan na asing, di luat on pe ala ni pambahenan ni Apostel Paulus pajongjonghon Barita na Uli dohot huaso ni Debata, gabe sisogo do ibana disi. Jala gok na manghasogohon Barita na Uli i. Ala nunga ndang adong be tondi pangarundingan di boruboru i, gabe mangamuk ma na torop i. Tarlumobi induk somang i, ai ndang adong be pangomoan sihirimon sian parompuan i. Didok Apostel Paulus dohot si Silas "na manggunturi huta, dohot manggaori adat nasida" (ayat 20-21). Gabe didok angka panguhum i ma nasida asa disintak ulos nasida jala dilinsingi (ayat 22), dung i dipamasuk ma nasida tu hurungan (ayat 23-24). Mangihuthon parenta sian panguhum i, didabu ma nasida tu hurungan parbagasan, momos ma patnasida dibeanghon (dipasung/ayat 24). Molo idaon ndang adong be harapan tu nasida boi malua sian hurungan i.
Huaso ni Debata Marhite Tangiang na Paluahon (ayat 25-34)
Nang pe di hurungan Apostel Paulus dohot si Silas, ndang mago panghirimon nasida tu Debata. Tongtong do nasida martangiang dohot mamuji goar ni Tuhan Jesus Kristus. Mangula ma Debata di bagasan hahomionNa. Tompu ma masa lalo bolon (ayat 26). Pola lalolalo ojahan ni hurungan i. Pintor mungkap ma saluhut pintu ni hurungan i, jala tanggal ma nang rantenasida. Gabe tarsunggul ma sijaga hurungan i, disintak ma podangna naeng maningkot, ai dirimpu naung maporus angka na tarhurung i. Di pandok na Apostel Paulus "unang bahen jea tu ho, ai dison do hami" pintor tarjolma ma si jaga hurungan i. Dibuat ma palito, didapothon ibana ma Apostel Paulus dohot si Silas, diida ibana ma huaso ni Debata di bagasan hadirion ni Apostel Paulus dohot si Silas huhut manungkap.
Gabe porsea do sijaga hurungan dohot isi ni bagasna ro di nasida saripe tu Jesus Kristus. Ditogihon ma nasida tu bagasna, diburi ma bogas ni linsinglinsing i, jala mangalehon dirina laho porsea jala tardidi (ayat 33-34). Jala ndang holan si jaga hurungan i na porsea tu Jesus. Dung torang ari, angka panguhum i pe gabe mabiar do jala porsea tu Jesus Kristus, jala dipalua Apostel Paulus dohot si Silas. Jala dung diboto angka panguhum i na halak Rom do Apostel Paulus, gabe mabiar ma nasida. Diapoapoi ma Apostel i jala dielek nasida asa ditadinghon huta i. Dipataridahon Jesus Kristus do huasoNa marhite tangiang.
Kesimpulan dan Refleksi
Minggunta tingki on i ma Minggu Rogate na marlapatan "martangiang/ berdoa" (Jeremia 29 : 12). Na porsea tu Debata ingkon dihangoluhon do ngolu martangiang di na mandalani angka ariari ni ngoluna, tarlumobi molo masa angka parungkilon adop di pardalanan ni ngolu. Marhite turpuk on dipaandar do, boha do Apostel Paulus dohot Silas marhite tangiang dohot pamujion i, manghilalahon pandonganion dohot huaso ni Debata di tingki marbarita na uli di luat Pilippi.
Tangiang i marhuaso do patupahon na so harimangan ni hajolmaonta mangurupi Apostel i di tingki di hurungan nasida. Nang hita pe sahat tu tingki on, mangula do Debata di hamaolan nang parungkilon na taadopi. Tapasahat ma sude angka na masa di ngolunta tu Debata marhite tangiang. Tapajoujou ma Debata di bagasan tangiang na elek mardongan pamujion, tangihonon ni Debata do hita. Amen.
Posting Komentar