Jamita Minggu 25 Mei 2025 Minggu Rogate tarsurat di Jeremia 29 ayat 7 - 14. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Tangiang tu Hademakon." Rap ma hita mangihuthon hatoranganna.
Pendahuluan
Mangula do si Jeremia di tongatonga ni bangso Juda, bangso angka na tangkang marroha na palipehon haporseaonnasida tu debata si leban. Alai dipatuduhon si Jeremia do tang ni haporseaonna martuhanhon Debata Jahowa. Panurirang Jeremia i ma sada panurirang na paling berhasil do di sepanjang sejarah ni bangso Israel. Suhatsuhat ni keberhasilanna i ma, parsihohotonna di Debata dohot hadaulatonna. Margogo situtu do panurirang i mangula, pasahathon Hata ni Tuhan i, tung pe di tongatonga ni angka hamaolon na mansai godang. Dipatuduhon ibana do parsihohotan, berintegritas, konsistensi dohot komitmen maradophon Debata, nang pe dibolus ibana godang angka hamaolon di ngoluna. Jotjot do ibana dipaburuburu, diancam. Alai margogo do ibana mangula di bagasan gogo ni tangiangna tu adopan ni Debata na sai tongtong mangurupi ibana di hamaolon i.
Turpuk on marisihon dung pe 70 taon bangso Israel asa mulak tu Jerusalem. Dihatangkangon roha ni bangso dipaingot nasida asa mulak tu dalan ni Debata. Tarbuang bangso Israel tu tano Babel sahat tu hamumulak tu Jerusalem. Dipaloas Debata tarbuang bangsoNa pola mansai leleng, ndang jempek tingki habubuang nasida songon na nilumbahon ni angka panurirang pargapgap. Ayat 10: Molo dung gok 70 taon di Babel ebatonHu ma hamu dohot pasintonghon tu hamu bagabagangKu na dengggan i asa mamboan hamu mulak tu inganan on. Gok na mangalului dalan asa boi malua sian habuangan i. Alai di saluhutna i, Tuhan i do na tuk paluahon bangso i.
Pembahasan
Tolu bagian bolon ojahan ni buku Jeremia on. Parjolo: Dipatolhas panurirang Jeremia do rimas dohot uhum ni Debata ala pangalaosion ni bangso i maradophon Debata, dibahen i tarbuang nasida. Paduahon: Dipatolhas panurirang Jeremia do taringot panghirimon tu bangso i. Habuangan dohot uhum tu nasida na ingkon mansohot do. Jala adong do bagabaga haluaon tu bangso i sian Debata. Patoluhon: Paraloan na pinatupa ni Panurirang Jeremia maralohon angka poda haliluon na ro tu bangso i.
Turpuk Jamita sian Jeremia 29 on, i ma di tingki bangso Israel di habuangan Babel. Bindu on ditongos si Jeremia marhite si Eleasa dohot Gemaria (Jeremia 29 : 3). Nunga be diboan bangso i tu habuangan Babel marhite raja Nebukadnesar. Di habuangan i, dokdok do sitaonon ni bangso Israel. Mago do panghirimon nasida di tingki sahat di habuangan i ala hansit dohot parir parniahapan ni bangso i di habuangan Babel. Dihilala bangso i do tekanan fisik dohot mental na mambahen nasida krisis di partondion mardebata Jahowa, ala mangula nasida di tongatonga ni bangso na so mananda Debata. Alai nang pe songon i diae bangso i, ndang buni bohi ni Debata. Ndang sip Debata mangida sitaonon na masa tu bangoNa i. Manghatai do Debata marhite panurirang Jeremia. Ndang mansohot parsaoran (hubungan) ni Debata dohot bangsoNa hinorhon ni habuangan i. Alai tongtong do diarahon Debata bangso i asa martangiang jala mangharingkoti hasonangan ni huta habuangan nasida.
Martangiang Laho Mangharingkoti Hasonangan (Kesejahteraan)
Ringkoti hamu hasonangan huta habuangan jala tangianghon hamu tu Jahowa, asa dohot hamu marhasonangan (ayat 7). Dilumbahon Jahowa do, molo naeng dapotan hasonangan bangso i, ingkon do parjolo marhasonangan huta inganan habuangan nasida. Marpardomuan do huta habuangan inganan parmianan nasida di tingki tarbuang dohot bangso i. Hasonangan (kesejahteraan) na nihirim ni bangso i, margantung do i tu kesejahteraan ni huta i. Diarahon si Jeremia do nasida asa tongtong gomos manangianghon huta nasida. Diarahon nasida asa unang be lalap dipandelean hinorhon ni habuangan ni nasida tu Babel i. Alai baliksa asa gabe jolma na produktif nasida. Jolma na mulaulaon. Mangula denggan tano dohot huta inganan habuangan nasida. Di angka tangiang dohot ulaon na pinatupa nasida, disi do idaon ni Debata mental nasida na denggan. Na tongtong marpanghirimon tu bagabaga haluaon na binagabagahon ni Debata. Laos mangalo angka panurirang pargapgap na sai mandok nunga ditandinghon Debata be bangso i. Ndang hea ditandinghon Debata bangsoNa nang pe satongkin nasida dididik Debata marhite habubuang nasida tu tano Babel. Ingkon marpanghirimon do bangso i tu Debata, marhite na manangianghon huta i dohot mangula ulaon nasida si ganup ari di bagasan roha na denggan, asa dapaotan hasonangan bangso i.
Mangalo Angka Parpoda Haliluon
Berusaha keras do panurirang Jeremia mangalo parpoda haliluon na adong di tongatonga ni bangso i. Di tingki i godang angka panurirang (pemimpin rohani ni Israel), pangarunding nipi, na dohot tu habuangan mangago panghirimon ni bangso i. Dipodahon nasida do angka na lipe sian lomo ni roha ni Jahowa holan tu kepentingan nasida pribadi dohot memperkaya angka diri nasida sandiri. Ndang diparrohahon nasida penderitaan na masa tu bangso i. Dao na pinasahat nasida sian lomo ni roha ni Debata. Ai sipaotooto do nasida, ndang Jahowa na marsuru nasida (ayat 8-9).
Bagabaga na Denggan (Janji Pemulihan)
Ditongos si Jeremia do hata on tu bangso na di habuangan Babel, laho pasintonghon pangantusion ni bangso i tu bagabaga ni Debata. Molo gok 70 taon di Babel, ingkon dipasintong Debata do bagabagaNa tu bangso i, na mamboan nasida mulak tu tano na pinasahat ni Debata tu ompu nasida si Abraham. Tarbuang pe nasida satongkin, ndang na salelenglelengna nasida manaon i. Sangkap Hasonangan do na pinarade ni Debata tu bangsoNa. Ndada sangkap tu hamagoan (ayat 11). Dibahen i, nang pe mangae (menderita) nasida satongkin, tongtong ma nasida mangula jala marsihohot di bagasan Tuhan i. Ai mulak do nasida angka na tarbuang i tu inganan haborhatan nasida i (ayat 14).
Kesimpulan dan Refleksi
Angka jolma na marhaposan tu Debata, i ma angka na tongtong marrogate (manghangoluhon ngolu na martangiang). Mangula angka na tinangianghonna di luat dohot angka ulaon inganan parmiananna be. Ai disi jala marhite i do Debata mangula, pasahathon angka hasonangan tu jolma na porsea. Na porsea ingkon gabe jolma na produktif do di angka luatna be. Ingkon parohon angka na positif dohot angka na denggan di angka luatna be. Ai molo marhasonangan do luatta be, dapotan hasonangan do nang hita. Margogo ma hita mangadopi angka na masa di ngolunta, las ni roha arsak pe. Diboto Debata do masa depanta jala sangkap na uli na denggan do angka sangkapNa. Sangkap hatuaon, rancangan damai sejahtera maradophon hita, diboto jala diaturhon Debata do saluhut pardalanan ni parngoluonta tu hasonangan ni ngolunta, hombar tu lomo ni roha ni Debata.
Molo talului Debata sian nasa rohanta sai na jumpang do Ibana. Dibahen i lului ma Jahowa di ngolum, marhite tangiang nang elekelekta tu adopan ni Debata. Ai ndang adong na tuk manirang hita sian Debata. Dibahen i tapasolhot ma tu Debata, ndang adong asing sian Debata pangalualuanta. Sangkap hatuaon i (rancangan damai sejahtera) nunga diparade Debata di hita. Dibahen i taharinggashon ma martangiang dohot mangulahon na denggan tu joloan on. Las ma rohanta jala sonang ma rohanta mamongoti angka ulaonta di habuanganta, di luatta, di inganan parmiananta be. Ai Debata na sun hinagogo mandongani hita masuk dohot haruar, arian dohot borngin, di dia pe hita maringanan, aha pe na masa di ngolunta. Taingot ma, Debata do hatuaonta, Ibana do haposanta di saluhut panggulmit ni ngolunta. Amen.
Posting Komentar