Jamita Minggu 29 September 2024 Minggu Pasampuluualuhon Dung Trinitatis tarsurat di buku Psalmen 124 ayat 1 - 8. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Sian Jahowa Sambing do Ro Pangurupion tu Hita." Rap ma hita mangihuthon hatoranganna.
Pendahuluan
Secara khusus, Psalmen bindu 124 i ma ende hananangkok tingki mamasuki Joro ni Debata. Psalmen on i ma gombaran haluaon sian mara huhut mangarahon bangso ni Debata laho manghamuliatehon denggan basaNa. Angkup ni i, ditogihon Psalmen do bangso i asa mangalehon ngolunasida tu Debata ala Debata do na boi paluahon nasida sian angka musu. Ala ni i, Psalmen bindu 124 on i ma sada sitiruan na denggan jala sintong tu sude halak Kristen laho mandapot hamonangan jala boi pasangaphon Debata di tongatonga ni musu na menghimpitnasida. Marhite hamonangan na dijalo Parpsalmen, dirajumi ibana do ia hamonangan sian musu i holan ala ni pangaramotion ni Debata sambing do. Jadi marhite turpuk on boi mangalehon jawaban teologis tu halak Kristen na tong maol manghatindanghon pangaramotion ni Debata di bagasan ngoluna.
Pembahasan
Di ayat 1 dohot 2 dipungka do bindu on dohot pandohan "aut unang Jahowa mandongani hita," na patoranghon ndang adong halak na boi malua sian lupaklupak musu jala manjua sian lupaklupak ni musu partondion. Mansai balga do angka mara dohot lupaklupak na diadopi Psalmen on. Alai disadari ibana do holan Jahowa sambing do na boi patupahon halongangan jala pamonanghon ibana sian angka musu. Porsea do ibana ndang adong musu manang aha pe na boi manaluhon halak na porsea tu Jahowa. Hata "aut unang Jahowa mandongani hita" i ma parulan Psalmen laho marnida turirurian ngoluna di tingki haporsukon. Diingot ibana do tingki boi ibana haruar sian ngingi ni musu, jullong, jala jorat na dibahen musuna. Di turpuk on Psalmen mangarahon halak porsea asa boi marningot adong do Debata di bangsoNa Israel.
Di ayat 2 diulahi Psalmen do aha na nidok di ayat 1 i ma adong do Jahowa na mangangkupi bangsoNa jala patoranghon adong do Jahowa di tongatonga ni parungkilon tingki mangadopi angka musuna. Nunga monang ibana, jadi marhitehite pengalaman naung dihilala ibana, ditogihon ma angka donganna asa manghatindanghon hamaradongon Jahowa songon aha na naung dirajumi ibana. Di ayat 2b sahat tu ayat 7 i ma panangkasion taringot tu angka musuna huhut panangkasion taringot rumang ni Jahowa na dialami ibana. Musu na dimaksud di ayat 2 on i ma jolma na bangkit mangalo bangsoNa. Musu na adong dison i ma musu na jahat jala ndang adong mananda asi roha. Alai molo musu di zaman nuaeng on i ma parporangan mangalo parhuaso, angka sigomgomi hasiangan haholomon on dohot angka tondi hajahaton na di ginjang i (patudos Epesus 6:12).
Dipatorang Psalmen on do di ayat 4-5 haroro ni musu na manghorhon haporsukon tudos ma songon aek jullong na gabe sunge na lonap na manegai tondi jala mambahen jolma gabe mate. Tondi i ma pingkiran, ateate jala harohaon. Jadi, aek i manggombarhon parhansitan na balga na niadopan ni Psalmen. Alai marhitehite ragam ni tantangan manang musu na diadopi ibana, lam dipatudu ibana do haperseaonna tu Jahowa umbahen didok ibana "Pinuji ma Jahowa na so mangalehon hita sisosoran ni angka nginginasida" (ayat 6). Marhite hata on tangkas do taida alasan ni ibana mamuji Jahowa i ma ala ndang dipaloas Jahowa Debata ibana gabe panganon sagi ni musu na jahat. Ala ni i di ayat 7 dipodahon ibana do tu hita porlu do pahehehon tondi tingki tertekan ala ni musu na ro tu hita. Dison boi ma idaonta, Psalmen ndada holan mamodahon manang mangajarhon parulan ni Jahowa sambing, alai naeng mangalehon surirang/informasi do ibana taringot na masa di bagasan ngoluna i ma ala naung diropanghon jorat musu sian tondina.
Puncak hamauliateon dohot pujipujian ni parPsalmen on lam tangkas ma didok ibana di ayat 8 "ianggo pangurupion di hita di bagasan goar ni Jahowa, sitompa langit dohot tano on." Hata on i ma pernyataan sahalak na dipalua sian sasude pangondol jala pernyataan parPsalmen mangalului dalan na tingkos laho haruar sian angka musuna. Ditiop ibana do mansai gomos haporseaonna tu Jahowa, gabe hot ma ibana jala jogi tung manang aha pe na masa di ngoluna. Tongtong ibana porsea diurupi Debata do ibana dohot bangso na pinilittNa i. Dipangke Psalmen do pengalaman ni ngoluna laho paboahon pambahenan ni Jahowa di ibana. Jala marhitehite pengalaman i ma dipatogu ibana haporseaonna adong do Jahowa na mangurupi jala mamasumasu ngoluna sonari sahat tu saleleleng ni lelengna.
Kesimpulan dan Refleksi
Marhite Psalmen bindu 124 on diajarhon do tu hita asa sude halak na porsea tu Jahowa mananda asi dohot holong ni rohaNa tu angka bangsoNa. Diajari do hita marhite Psalmen on asa mananda dirinta i ma na mangaku hita gabe halak na porsea tu Jahowa ingkon do olo manghatindanghon jala mangido pangurupion di hita di bagasan goar ni Jahowa sitompa langit dohot tano on." Ingkon olo do hita manjalo bisuk dohot hagogoon na sian Jahowa laho mangadopi angka na masa di ngolunta si ganup ari. Ingkon boi do hita maniru sikap ni Psalmen on na tongtong marhaporusan tu Jahowa tung pe di bagasan haporsukon ibana. Ingot ma, holan sian Jahowa do tajalo pangurupion i, ndang adong sian na asing (debata sileban). Tung ro pe angka sahit, haporsukon dohot ragam ni tantangan di portibi on. Marhaporusan tu Jahowa ma hita na boi paluahon jala na mamasumasu ngolunta sahat ro di saleleng ni lelengna. Amen.
Posting Komentar