Jamita Minggu 6 Oktober 2024 Minggu Pasampulusiahon Dung Trinitatis tarsurat di buku 2 Timoteus 4 ayat 1 - 5. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Jamitahon Hata i, Hajongjonghon di Tingki na Une nang so Une." Rap ma hita mangihuthon hatoranganna.
Pendahuluan
Surat paduahon tu si Timoteus sian Apostel Paulus on marisihon angka pangajaran, parmahanion dohot poda asa tongtong marsada ni roha dohot manghangoluhon Hata ni Debata marhite mangula di bagasan hasintongan. Surat na paduaon tu si Timoteus digurithon di tingki masa di bagasan hurungan di Rom di taon 64-65 M. Digurithon Apostel Paulus surat on, laho patoguhon haporseaon jala mangalo angka pangajari dohot parpoda haliluon na manegai angka ulaon hasintongan, ai mansai malo do nasida manait dohot mamboan tu angka na pageokgeokhon pinggol, gabe sialo hasintongan dohot na so marhasatiaon manang munsat sian Debata Jahowa. Sian Bindu 4 on disagi ma gabe tolu ondolan na mansai ringkot, i ma: 1. Burju mangaradoti Tohonan (ayat 1-5), 2. Jonok nama ajal ni Apostel i (ayat 6-18) dohot 3. Hata Parujungan (19-22).
Pembahasan
1. Jamitahon Hata i, Hajongjonghon di Ganup Tingki.
Sian turpuk on dipaumbuk Apostel Paulus surat on tu si Timoteus, i ma Debata do manguhumi na mangolu dohot na mate jala na gabe sitindangi ni Debata Jahowa dihapaparonNa dohot harajaonNa. Apostel Paulus na paingothon si Timoteus taringot tu pardalanan ni ulaon panghobasion i tung mansai godang do hamaolon na diadopi di na mambaritahon dohot manghatidanghon hapapatar dohot harajaon ni Debata. Na paradeon hadirion dohot patoguon si Timoteus do Apostel Paulus, asa unang di bagasan hagangguon ni roha laho manjamitahon dohot mamaritahon Barita na Uli. Pambohalion na tu si Timoteus on asa manongtong marguru dohot marojahan tu Hata ni Debata. Ala ni i do dibuha ni ayat 1 on pandohan na mandok "Dijolo ni Debata dohot Jesus Kristus," na pabotohon asa sai jumolo marhabiaran tu Debata laho pasahathon dohot manjamitahon Hata ni Debata, ndada saguru tu lomo ni roha ni hajolmaon. Laos dipabotohon muse saluhut nasa na pinasahat dohot na dibaritahon pe ndang adong na so sian parbinotoan ni Debata dohot sian na pinaborhat sian ojahan Hata ni Debata.
Mangharingkoti parjamitaon na marojahan sian Hata ni Debata. Marhite sian ayat 2 on dipanghulingi asa borhat laho manjamitahon jala ndada tu sahalak jolma alai tu suluhut do hasahatan ni i asa borhat manjamitahon. Dihangkam sian ayat on do muse na Debata do marsuru huhut tonaNa (mandat/Amanat Agung na sian Debata), ndada parsuru ni jolma manang Apostel i tu si Timoteus, alai dipabotohon do tu saluhutna jolma asa mangarade borhat pasahathon Barita na Uli. Marhahonaan ma ayat on tu tona manang Amanat Agung na pinasahat ni Jesus na marpandohan songon di Mateus 28:19-20 "Laho ma hamu, podai hamu ma saluhut bangso, didi hamu ma nasida tu bagasan goar ni Ama, Anak dohot Tondi Parbadia. Laos ajari hamu ma nasida mangaradoti nasa hata naung Hupatikhon tu hamu ... ."
Songon i tongtong dipatorang turpuk on do sian na manjamitahon di ganup tingki i ma di tingki na une nang so une, na marlapatan ndada na pinasahat i marnida tingki na hinalomohon ni roha ni jolma manang laho pasonangsonanghon ngolu ni jolma, alai Jamita i hombar tu paminsangion, paingothon, mangapoi dohot pamodaion di ganup tingki. Ala ni i do umbahen asa parjamita pe di hangoluhonon ma Jamita na pinasahatna, ndada holan na pasahathon alai parsidohot do muse di pangulahonon. Ai dipadasip sian Barita na Uli na mandok "Ai na marngolu do Hata ni Debata jala marpanghorhon, jala tumajom sian nasa podang siduababa, jala torus do disirang hosa dohat tondi, ringring dohot utohutokna, laos diuhumi do na sinangkapan dohot na piningkir ni roha" (Heber 4:12).
2. Hamonanghon Hasintongan Marojahan Sian Hata ni Debata.
Torop dope angka na so manghalomohon jala na so manjalo Barita na Uli i. Ala ni i do umbahen dipaingot asa jaga jala marsihohot di haporseaon na sintong, ai jumpang hita dope angka pangajari dohot parpoda haliluon na manegai dohot mangalo ulaon na marhasintongan di Hata ni Debata. Angka dia ma pangalaho na didokna disi, tangkas do dipatorang sian turpuk on i ma di angka na sai mangihuthon hisaphisap sandiri ma alaponnasida pangajari na pageokgeokhon pinggolnasida jala na paelenghonsa tu angka turiturian. Sian ayat 3 on dipaingot marpardomuan tu na masa na laho siadopan ni angka Parbarita na Uli. Apostel Paulus maradophon si Timoteus asa marsitutu dohot ramot huhut jamot di sude angka na pinasahat ni Debata di angka panghobasionna.
Laos marnida na masa di tingki i dohot di tingki si nuaeng pe gabe dihalomohon angka jolma i nama angka parbarita na olo siaturaonna parjamitaan, ndang be mangihut tu hasintongan ni Hata ni Debata. Tumimbo nama nasa pangidoan ni jolma laho pasonanghon dirina hombar tu angka pageokgeokhon pinggolnasida dohot paelenghonsa tu angka turiturian. Suang songon i ndang be dihabiari angka parbarita dohot siparpoda hahiliuon be marhabiaran mida Debata, ai dietongnasida nama dalan angka pangomoan dohot dalan pasonanghon rohana.
3. Radoti Ulaon Parbaritaan na Uli, Sahat Ula Tohonanmi.
Pangarimpuni sian turpuk ni Jamita on (ayat 5) dipabotohon jala mangondolhon taringot tu Parbarita na Uli (parhobas manang parhalado) na marsitutu di bagasan hasintongan dohot mangadopi angka na masa, i ma: Asa unang mabuk roham, taon na jat, radoti na tama Parbarita na uli, sahat ula tohonanmi. Apostel Paulus paradehon ulaon di angka Parbarita na Uli asa manahan di angka na masa marhite haporseaon na togu, jala ndang mangulahon angka haramunon dohot na maralo tu lomo ni roha ni Debata. Jala Parbarita na Uli ingkon rade manaon angka na jat. Alana jumpangsa di parngoluan on do angka na maralo manang na so manjalo hasintongan ni Hata ni Debata. Gabe sipeopon angka Parbarita na Uli ma Barita na Uli Rom 12:19, 21 na mandok "Hamu, angka na hinaholongan, unang hamu marlulu; pasahat hamu ma rimas i (tu Debata), ai tarsurat do "Di Ahu do pamaloson, Ahu pe mamaloshon, ninna Tuhan i. Unang ma talu ho dibahen hajahaton; alai taluhon ma hajahaton i marhitehite na denggan!"
Siradotan ni angka Parbarita na Uli i ma ringgas mamaritahon Barita na Uli i jala sahat ula tohonanmi. Ndang adong sidalian manang gabe so diharingkothon laho marbarita na Uli hombar di angka partinaonan na masa, dohot di angka sipatupaon manang marpardomuan tu angka hurang ni sinamot dohot na asing. Naung tarjou jala tarpillit huhut na gabe sitindangi ni Debata do laho borhat marbarita na Uli. Songon hata na tarsurat sian 1 Petrus 2:9 "Alai marga na pinillit do hamu, hamalimon na raja, bangso na badia, houm na ginomgomanNa, asa tung dibaritahon hamu denggan ni harohaon ni Ibana, naung manjou hamu sian na holom tu hatiuronNa halongangan i."
Kesimpulan dan Refleksi
1. Pangajarion marojahan sian Hata ni Debata maradophon angka jolma marparbuehon angka pangalaho dohot parulaon na nihalomohon ni Debata Jahowa. Ndada mangalului hasangapon dohot hamuliaon di hajolmaon molo borhat hita laho marbarita na uli. Ai ndada dirinami hujamitahon hami, Kristus Jesus i do, paboa Ibana Tuhan; alai naposomuna do hami ala ni Jesus (2 Korint 4:5).
2. Na tarjou jala na tarpillit do hita laho marbarita na uli diparsuru ni Debata na tu hita, dibahen i asa taharinggashon jala taarahon ma nasa jolma ro tu Debata Jahowa.
Posting Komentar