Jamita Partangiangan Epistel Minggu 6 Oktober 2024 Minggu Pasampulusiahon Dung Trinitatis tarsurat di buku 2 Musa 4 ayat 10 - 17. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Jamitahon Hata i, Hajongjonghon di Tingki na Une nang so Une." Rap ma hita mangihuthon hatoranganna.
Pendahuluan
Molo pinaihutihut na masa di partingkian si nuaeng on taringot tu parsuru ni sasahalak jolma tu donganna, jumpa do parrohaon sipangoloi jala adong do muse di angka na maralus huhut dibahen sidalianna asa unang disuru manang tu na asing ma dipasahat angka ulaon i. Dipataridahon si Musa do hajolmaonna na so malo marhata jala dokdok do pamanganna huhut hallang dilana. Hagaleon dohot na hurang tama maradophon jolma na pinabotohon ni si Musa tu Debata. Alai dipabotohon Debata Jahowa do tu ibana dalan asa dihaporseai jolma manang bangso i, na sinuru ni Debata do ibana laho patupahon tandaNa, donganan ni Debata Jahowa do ibana, i ma tungkot na di tanganna i gabe ulok, songon i nang marhite na manurdukhon tanganna tu gedekgedekna gabe puruon, mamontar songon hapur, laos songon i muse diulahi gabe sumuang songon sibukna hian, jala dipatuduhon muse tu ibana tanda, i ma na tinahuna aek sian batang aek gabe mudar dung ro di na mahiang i (2 Musa 4:2-9).
Ndang tarbahen si Musa laho patupahon saluhutna i molo so marhitehon pandonganion dohot parsuruon ni Debata Jahowa di ibana. Tung pe ragam hamaolon dohot na masa na niadopan ni si Musa laho manguluhon bangso Israel, alai ndang pasombuon ni Debata Jahowa si Musa, alai didongani jala diparbohali do ibana laho patupahon angka na didok ni Debata Jahowa.
Pembahasan
1. Dipargogoi jala Didongani Debata Laho Patupahon ParsuruonNa.
Ulaon na balga jala na borat do na ingkon ulahonon ni si Musa laho mamboan bangso i ruar sian tano Misir. Ai manopot dalan na laho siboluson na so dibotonasida dope dohot dalan halongonan suang songon i patupahon nasa na ringkot dihajongjongan ni bangso i. Marhite pandohan ni si Musa maradophon Debata Jahowa na paboahon mansai jaga do ibana di dirina jala na so olo mangadopi angka hamaolon huhut ndang tabahensa laho manguluhon jala maradophon bangso Israel. Dirajumi si Musa do torop dope na boi jala na pantas laho mangulahon parsuruon ni Debata Jahowa tu bangsoNa. Astuan ni pandok ni si Musa di ayat 10 on taringot tu hagaleonna do na pinabotohonna tu Debata jala sian i asa patuduon ni Debata ma tu ibana dalan na laho siulahononna asa unang gabe parohon rimas dohot penolakan sian bangso i. Tung sura naung dipaingot jala dipatuduhon Debata Jahowa di ibana nasa tanda laho paposhon rohana huhut botoonna ma Debata raphon ibana laho pasahathon nasa tona dohot parsuru ni Debata di ibana maradophon bangsoNa. Alai hinorhon ni ganggu ni rohana jala dihilala rohana do ndang tarbahen sian hagogoon ni hajolmaon maradophon bangso i. Diula pe angka ulaon i molo so adong do pangantusionna jala ndang tarjalo jolma pandohan gabe manghorhon tu hailaon, i do gabe so pola diharingkothon ibana manjalo ulaon i. Pandohan ni si Musa maradophon Debata Jahowa "Iale Tuhanhu, ianggo ahu ndang jolma parhata ahu, nang olat ni nantuari, nang olat ni nantuari sada, nang olat ni dung manghatai Ho dohot naposoMon, ai dokdok do pamanganhu jala hallang dilanghu." Na pabotohon do ibana, sian hajolmaonna, na so tarbahen ibana do patupahon jala ndang tolap gogona. Pangantusion sian pandohan on na mangido panuturion dohot pangajarion sian Debata Jahowa, asa nasa panghataion na ruar sian pamanganna i ma panghataion na marhadomuan sian Debata Jahowa jala asa unang manghorhon sogo ni roha, gabe mamboan tu hasesega di tonga ni bangso i.
Dipaumbuk sian turpuk on do pandohan ni Debata Jahowa tu si Musa i ma na patolhashon jala pabotohon angka na tinompa ni Debata marhite sian nasa pamatang ni jolma saluhutna do i marhite Debata do na jumadihon jala na pabotohon huhut na mangaturhonsa di angka ulaonna be. Dipapatar Debata Jahowa do di adopan ni si Musa na holan Ibana do na tuk laho patupahonsa. Debata mangalehon pangantusion dohot pahothon si Musa, na so jadi tarpatupa ni jolma jala manang na ise pe, nasa na adong di parngoluon ni jolma molo so marhite sian Ibana.
Parsuru ni Debata Jahowa tu si Musa asa borhat jala dipasiat Tuhan i do pangidoanna i ma didongani jala diurupi Tuhan i do ibana marhite pasahathon hata sian pamanganna jala na mian do Debata laho paingothon jala dipodai di angka na laho sidohononna. Ndang pasombuon ni Debata si Musa borhat tu tano na niuarihon, sai donganan jala ramotan ni Debata do ibana patupahon saluhu na tinonahon dohot podahonon ni Debata Jahowa. Marhite sian pandonganion ni Debata, pamangan dohot angka si dohonon ni si Musa gabe margogo jala ndang mabiar be ibana laho patolhashon angka na laho si pasahathonna, ai saluhutna i marhite Debata Jahowa do na pasahathon si dohononna.
2. Dihalomohon Debata do Nasa na Mangoloi Ibana jala UrupanNa.
Jotjot do marsidalian jolma i molo dipasahat angka sada ulaon na laho sihobasanna. Adong do muse, diundukhon do ulaon i, alai ndang diulahon jala dipasahat muse tu angka donganna, songon na so dipertanggungjawabhon do angka na laho siulahononna. Hinorhon ni angka hamaolon jala mabiar mangadopi angka sitaonon dohot manguluhon bangso Israel, sai dipangido si Musa do tu Debata Jahowa asa na asing sian ibana laho mangulahon parsuru ni Debata. Nang di ngolu ni hajolmaonta jotjot do sai dipasiding mangadopi angka ulaon na mansai borat jala molo mangadopi angka tantangan. Songon na nialaman ni si Musa di parsuru ni Debata na laho patureturehon jala mamboan bangso i ruar sian tano parhatobanan Misir tu inganan na niuarihon Debata. Paraloan na mansai balga do na laho adopan ni si Musa i ma mangadopi nasa bangso na asing di tingki na di pardalanan mandapothon inganan sipatuduhonon ni Debata, songon i maralohon nasa parrohaon ni bangso Israel na maralo tu roha ni Debata Jahowa, nang maradophon tu hadirionna.
Ndang dihalomohon Debata na marsidalian manang di hagangguon ni roha ni jolma i. Manongtong do dipatupa Debata Jahowa dalan pasauthon sangkapNa laho mangalehon haluaon dohot hangoluan tu bangsoNa. Tung pe tarrimas Debata mangadopi angka alus ni si Musa, alai marpamuati do rohaNa jala sai dipatupa do mambuat roha jala pahothon haporseaon ni si Musa huhut marhite holong ni rohaNa do pabotohon tu ibana ringkot ni dongan panghobasi laho mamboan bangso i. Si Aron i ma hahana sian marga Lepi, dipabotohon Debata do sangkap na laho sisangkapanna huhut naparsidohot do Debata Jahowa mandongani dohot pasahathon angka na laho si dohononna dohot si patupaonna. Hombar sian turpuk on, ringkot do hape mardongan manang rap manghobasi ulaon na pinasahat ni Debata. Molo tung adong sian dongan na marhagaleon, adong ma donganna marsisungkunan, donganna laho patoguhon jala marsiururupan laho mangulahon parsuruon ni Debata Jahowa.
3. Tarpatupa Debata do Halongangan jala Patulushon SangkapNa.
Dipatolhas Debata do tu si Musa angka na laho si radotannasida hombar tu parsuru ni Debata tu nasida. Gabe masipaleanan angka ulaon panghobasion ma si Musa dohot si Aron, jala Debata mian di bagasan roha dohot hadirionnasida. Laos tarpatupa Debata do di jolo ni si Musa angka na so sian hagogoon jala na piningkiranna tarlumobi ma haunduhon ni jolma i laho manjalo angka ulaon na sian Tuhan i. Tarpatupa Debata do halongangan jala patulushon sangkapNa, ndang adong na boi mangambati angka na sinangkapan ni Debata di pardalanan ni ngolu ni bangsoNa songon i nang di hita jolma. Dipamora Debata do hita di angka pangantusion jala dipangke do hita laho pasahathon dohot mamaritahon angka halongangan na binahenNa marhite naposoNa dohot nasa angka na porsea i. Debata Jahowa mamangkulingi jala mampargogoi laho patupahon nasa na sinangkapanNa. Songon Hata ni Debata na tarsurat di Jeremia 29:11 "Ai nunga tangkas Huboto sangkap angka na Husangkapi taringot tu hamu, ninna Jahowa, sangkap hasonangan do tahe ndada tu hamagoan, asa Ahu mangalehon tu hamu ujung na hinalungunhonmuna."
Kesimpulan dan Refleksi
1. Tung godang pe angka sipangambati laho mamaritahon Hata ni Tuhanta, jala di bagasan hagaleon pe na masa di parngoluonta alai na so jadi sundat angka sangkap ni Debata Jahowa di bagasan pardalanan ni ngolunta. Sapala naung dijou, ditodo jala dipillit Debata hita laho borhat mangulahon angka na sinuruNa, manongtong do sai donganan jala pargogoonNa hita mangulahon saluhutna i. Songon na tarsurat di Jesaya 50:4 "Nunga dilehon Tuhan Jahowa tu ahu dila sisean, asa huboto pasabam roha ni na loja marhite sian hata i. Sai disungguli do ahu ganup sogot, dipatinggil pinggolhu marbinege, songon sisean."
2. Debata do na mangalehon di hita angka ulaon i jala disuru do hita laho mangulahon angka na sinuruNa, dibahen i unang tajua jala marsidalian hita, alai tapangido ma hagogoon, habisuhon jala marpangunsandean ma hita tu Debata na mangalehon di hita nasa ragam ni pasupasuNa. Unang mabiar hita manjamitahon dohot mamaritahon Barita na Uli i. Ndang ala ni hamaloon manang sinadongan ni hajolmaon, alai Debata do na marsuru jala gabe sipangoloi ma hita di parsuru ni Debata Jahowa.
Posting Komentar