Jamita Partangiangan Epistel Minggu 29 September 2024 Minggu Pasampuluualuhon Dung Trinitatis tarsurat di buku Markus 9 ayat 38 - 50. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Sian Jahowa Sambing do Ro Pangurupion tu Hita." Rap ma hita mangihuthon hatoranganna.
Pendahuluan
Turpuk on manaringoti na masa tingki di huta Kapernaum, jala konteks JamitaNa i ma laho mamodai manang mangalehon bohal partondion tu angka siseanNa, siala jonok nama tingkina Ibana tu Jerusalem. Ragam angka permasalahan di angka sisean ni Tuhan Jesus, i ma ise na sumurung sian nasida (ayat 33-37), identitas nasida di masyarakat (ayat 38-41), dohot pembinaan pangajarion na gabe sisean (ayat 42-50). Di masa ni Tuhan Jesus, torop do jolma porsea tu tondi na jat, jala porsea do nasida molo masa parsahiton tu nasida holan ala ni tondi na jahat i do. Di partingkian hatiha i adong cara na dipangkenasida laho pabali tondi na jahat i, i ma molo diboto sasahalak do sada goar na umgogo sian tondi na jahat i boi do malua sasahalak ala ni i.
Pembahasan
Dipaboa si Johannes do na adong sahalak na boi pabalihon angka sibolis marhite goar ni Jesus, jala keberatanna: 1) Mabiar nasida molo disalahgunakan goar ni Jesus i. 2) Ai holan nasida do sisean jala ingkon nasida di na patut mamangke goar ni Jesus. Alai dialusi Jesus do si Johanes asa unang diorai nasida, ai na ginoaran mangurupi do nasida molo dipangke goar ni Jesus jala margogo nasida marhite goarNa i. On ma tandana holong ni Kristus ndada holan tu sisean i, jala margogo do manang ise pe na mangasahon goar ni Tuhan i, jala manang ise pe na painumhon aek santahu tu angka sisean di bagasan goar ni Kristus, dapotan upa do ibana sian Tuhan i. On ma na patuduhon holong ni Kristus bersifat universal tu sude manisia. Barita las ni roha do on tu halak Kristen na paboahon nasida milik Kristus. On ma gabe alasan ndada boi hita gabe ondingonding di jolma na laho melayani di harajaon ni Debata.
Di ayat 42-50 dipaboa Kristus do uhum tu angka na sala mambege goarNa manang na mambahen halak gabe lilu, i ma: Digantunghon batu losung tu rungkungna laho mangalononghon ibana tu laut. Marlapatan ma i hamatean do jambarna jala tu naroko, tu api na so ra mintop, di na so ra mate gulokna. Pandohan na mandok ingkon digotap tangan, pat, mata ingkon dipulsikhon unang ma nian diantusi secara harafiah. Pandohan i ma na mandok molo adong na mambahen gabe mardosa naeng ma nian dipadao jala dipaila, ai ndada tangan, pat, mata na mambahen mardosa roha parbagason do (tempat dosa adalah jiwa bukan organ tubuh jasmani). Roha i do na ingkon dipauba asa boi hita bongot tu harajaon ni Debata. Di ayat 49-50 diarahon do angka sisean asa gabe sira di tongatonga ni portibi on. Na marlapatan, boi gabe mempengaruhi sude angka dongan asa lam mananda tu Kristus. Unang ma nian targoar sisean alai hambar do dihilala dongan angka pambahenanna, jala ndang sesuai tu pangalaho ni siihuthon Jesus Kristus.
Kesimpulan dan Refleksi
Ojahan marhite turpuk on paboahon tu hita "Sian Jahowa Sambing do Ro Pangurupion i," na marlapatan hita halak na tarjou gabe sisean laho mamaritahon holong ni Kristus i, naeng ma nian bersikap terbuka tu angka donganta na asing. Jala unang ma nian adong kecemburuan sosial songon sisean ni Tuhan Jesus i. Jala gabe sira ma hita di tongatonga ni ulaonta, keluarganta, masyarakat, gereja, asa boi dihilala angka dongan na di humaliangta, na tarjou do hita gabe sisean ni Jesus Kristus. Hagogoon laho mangalo huaso ni sibolis huhut parungkilon di bagasan ngolunta on, dilehon do tu hita holan di bagasan Tuhan Jesus Kristus. Na naung hehe jala manaluhon hamatean. Dilehon Tuhan Jesus do tu hita i ma janji pandonganionNa na mandok "laos ajari hamu ma nasida mangaradoti nasa hata naung hupatikhon tu hamu. Ai ida ma, sai na dongananHu do hamu ganup ari, rasirasa ro ajal ni hasiangan on" (Mateus 28:20). Amen.
2 komentar