Jamita Malam Natal 24 Desember 2024 tarsurat di Lukas 2 ayat 8 - 14. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Barita Halalas ni Roha Godang tu Saluhut Bangso." Rap ma hita mangihuthon hatoranganna.
Pendahuluan
Molo tapamanat angka na masa di ombas on, godang dope na mambibiari parngoluonta. Hinorhon ni Pandemi Covid (2019-2021) naung salpu i, perekonomian ni torop bangso nang negaranta sipauliulion dope. Ala ekonomi global na bermasalah on sai adong do pangontakna di angka pengusaha na torop parkarejona. Adong na deba patupahon penutupan perusahaan, gabe martamba ma pengangguran, adong na patupahon pengurangan parkarejona gabe godang ma na hona PHK. Angka na masa on manghorhon tu lam timbona ulaon hajahaton, isarana martamba angka begal, pencopet, panangko dohot angka na asing. Tingkat hapogoson ni pardagingon on boi do pagalehon haporseaon nang lam tu galena kepedulian sosial di tongatonga ni parngoluonta.
Gombaran ni ngolu na masa sinuaeng on, tong do hea masa di tongatonga ni bangso Israel uju i di na gok kesenjangan sosial. Angka pangituai na marhobas di bagas joro madabu tu ulaon rutinisme nang kemunafikan, panggomgomi gabe boneka ni penjajah Rom, angka na mora gabe menindas angka na pogos. Alai dibalik ni i sai adong dope na sai paimaimahon haroro ni Mesias na binagabagahon di Padan na Robi, na dihaposi boi paluahon nasida sian gomgoman ni penjajah, nang na boi manguba parsorion ni ngolu sian hadadabu ni nasida. Lumobi ma di angka masyarakat "kelas bawah" na jotjot gabe korban ketidakadilan ni penguasa nang pengusaha. Sai mangolu dope di nasida panghirimon di haroro ni Mesias na sian Debata laho paluahon jala na mangalehon hadengganon ni parngoluon ni bangso i.
Di Jamita Borngin Natal on, i ma na gabe alus ni panghirimon torop jolma di tongatonga ni bangso i. Di na ro surusuruan ni Debata pasahathon barita las ni roha godang tu nasida. Angka parmahan do jumolo gabe hasahatan ni barita i. Boasa tu angka parmahan? I do na songon parhitean torop jolma ujui, masyarakat "kelas bawah" alai marpangalaho na satia laho manjaga angka na pinarmahanna. Di nasida na sai mangolu dope panghirimon di haroro ni Mesias ni Debata.
Pembahasan
Mangihuthon angka penafsir, ia ladang inganan ni parmahan na manjaga angka dorbia/ birubiru i, hira 2,3 Km daona sian huta hatubuan ni Jesus i ma Betlehem. Panurat Lukas memang ndang apala patoranghon letak geografis, na rumingkot di ibana patoranghon ulaon ni parmahan di ladang i, arian nang borngin sai rap dohot na pinarmahanna. Sai na sigop do nasida manjaga angka dorbia i. Sotung adong angka binatang panoro laho mamolgak birubiru i, nang angka panangko laho manangko angka birubiru i. Lumobi ma molo borngin, ingkon sai dungo do nasida. Ala jumotjot do panangko mangula ulaonna di bornginna i. Jadi mansai jarang do nasida boi menikmati hademakon di bornginna i. Haholomon di borngin dohot mambahen situasi kontras diharoro ni surusuruan di borngin i, rap mardongan hamuliaon pardisurgo na manondangi angka parmahan i. Borngin na holom huhut hohom, di na satongkin i gabe mansai ribur ala ende pujian parangan pardisurgo marsaringar di tongatonga ni angka parmahan i. Dihatarsonggoton nang biar ni roha nasida, laos didok surusuruan i "Unang mabiar hamu; ai barita halalas ni roha godang do huboan tu hamuna, parsaulian ni sandok bangso (Junani - Panti to lao; Inggris - All the people, sasintongna martudutudu tu bangso Israel). Ala konteks Lukas bindu 1-2 gumodang do manaringoti haluan ni bangso Israel (pat. Luk. 1: 68, 72-74; 2:32). Hata Yunani "laos" di surat ni si Lukas dilapati martudutudu tu bangso Israel. Jadi boi diantusi angka parmahan i, na parsidohot do nasida taruli di barita las ni roha godang i. Didok do muse di ayat 10 dohot 11, hata "hamu" (Junani Hymin) laho mangondolhon parsidohotan nasida hasahatan ni barita i.
Adong tolu hal na gabe ojahan ni barita na binoan ni surusuruan on tardok barita las ni roha godang.
Na parjolo, ia barita on marisihon barita na uli taringot halalas ni roha godang. Hata "barita" (Junani Euangelizomai memberitakan kabar baik, memberitakan sesuatu yang baik). Las ni roha na nihataan dison ndang las ni roha na somal, alai las ni roha godang (Yun. Charan megalen). Haru barita hatutubu ni si Johanes pandidi tardok barita las ni roha, lumobi ma barita hatutubu ni Sipalua i. Boi idaonta angka parangan pardisurgo na binaritahon ni si Lukas on gok las ni roha mamujimuji Tuhan i (Lukas 2:13-14). Suang songon i pamujian ni angka parmahan (2:20) dung sahat barita i tu nasida migor borhat nasida tu Betlehem.
Na paduahon, barita on marisihon haluaon na balga jala godang na hinanghamna (Lukas 2:11). Molo tapamanat di ayat on tarida angka goar na dipasahat tu Jesus, Sipalua, Kristus, Tuhan, pomparan ni si Daud. Jotjot do tarida angka goar on molo taparateatehon di Lukas bindu 1-2. Isarana di Lukas 1:69 ia haluaon sian Debata diaithon tu pomparan ni si Daud. Di Lukas bindu 2:26 tu si Simeon dipaboa Tondi Porbadia paboa na so mate ibana so jumolo mangida Kristus Tuhan i. Hadodomu ni 4 gelar di ayat 11 on patuduhon sada ondolan ia Posoposo na tubu di bara ni pinahan di Betlehem, posoposo na luar biasa, gabe barita haluaon na bolon.
Na Patoluhon, barita on marisihon hadameon na manghamham saluhutna na di tano on (Lukas 2:14). Hata "tano on" (Yun. Kosmik: martudutudu tu saluhut alam semesta). Tung saluhut na tinompa ni Debata taruli di hadameon na sian Tuhan i. Di ayat 14 on tangkas idaonta kontras ni hata: surgo - tano; Debata - jolma. Hatutubu ni Jesus mamboan pamujian tu Debata na di surgo, laos mangihut hadameon na di tano on, di angka jolma na hinalomohon ni Debata.
Sian ayat 14 on, gabe boi putihonta taringot "hadameon" (Junani - Eirene) na dibasabasahon marhitehite hatutubu ni Jesus. Hadameon on tartait tu pardomuan na uli, i ma surgo dohot tano on; Debata dohot jolma. Hadameon on dibasabasahon tu nasa jolma halomoanNa (Junani - Anthropoi cudokias - manusia yang berkenan kepadaNya). Hata on martudutudu tu bangso na pinillit ni Debata, jala na tu nasida lomo roha ni Debata pasahathon pasupasuNa. la konteks Lukas 1-2 patuduhon Debata na mamarateatehon nasa jolma na mananda hagaleonna (Lukas 1:46-48), jala na mabiar maradophon Debata (Lukas 1: 50). Alai baliksa dihasogohon Debata do jolma na ginjang roha (Lukas 1:51-52).
Barita na binoan ni surusuruan tu angka parmahan on gabe barita na bolon, na tarsar. Ala haroro ni Sipalua nunga mansai leleng dipaima nasida nang ompunasida. Mamungka sian angka panurirang di Padan na Robi, sahat tu 400 taon na parpudi dung so adong be manurirangi angka panurirang dung si Maleaki. Didok ma ombas i zaman antara dua perjanjian. Porsea do nasida ia Mesias i, i ma na paluahon nasida sian rante na mangihoti saleleng on. Angka huaso ni penjajah nang huaso ni dosa na manghurung nasida na sai laon i. Marhite Mesias Sipalua i ma dihirim nasida muse jongjong harajaon songon uju nirajaan si Daud bangso i. Mangihuthon angka pande bisuk, surusuruan na pasahathon barita taringot hatutubu ni Jesus tu angka parmahan i margoar "Migdal-Eder = Menara Eder. Inganan i ma parmianan ni angka birubiru na gabe pelean situtungon na pinasahat ni malim di bagas joro, pelean hasesaan ni dosa. Pelean situtungon on paingothon bangso i paboa tung mansai maol do laho mandalanhon uhum di Padan na Robi (Taurat Musa). Ala ni maolna dirajumi ma godang dosa nasida. Siala ni i ringkot ma patupaon pelean situtungon i, marhirehite birubiru na so marlaok, na sineat di bagas joro di Jerusalem.
Uju surusuruan ni Tuhan i pabotohon naung tubu di borngin i Sipalua (Mesias), marlapatan dang ringkot be nasida patupahon pelean situtungon i songon na somal niula nasida nasailaon i (Heber 10 : 10 - 14). Ala nunga jumpa be birubiru ni Debata na gabe singkat ni angka pelean situtungon i na tubu di Betlehem borngin i. Ibana do na mangalehon jaminan haluaon tu nasida (Rom 5:9-10). Di angka parmahan, Sipalua na tubu i paluahon nasida sian uhum Taurat laos manggohi tuntutan uhum i (Mateus 5 : 17).
Kesimpulan dan Refleksi
Natal i ma ari naung binuhul ni Debata sian najolo na digohi di ari parsorang ni Jesus di bara ni pinahan di Betlehem. Hamamasa ni hatutubu ni Sipalua di huta Betlehem huta na faktual adong sahat tu partingkian saonari, 700 taon andorang so tubu Sipalua, panurirang Mika nunga manurirangkon huta Betlehem gabe hatubuan ni Mesias i. Barita Natal na sahat tu angka parmahan i gabe barita las ni roha godang ala Debata manggohi padanNa. Satia do Ibana jala konsisten di angka padan naung niuarihonNa marhite angka naposoNa i. Taruli ma nang hita saluhutna na mamestahon borngin Natal di ombas on, ala nunga tajanghon posoposo na tubu di Betlehem 2000 taon naung salpu di rohanta ganup marsadasada.
Las ni roha godang naung sahat tu hita di borngin Natal on ma patubuhon panghirimon na mangolu di hita asa martamba ma haringgason laho mulaulaon jala pasangaphon Debata naung jumolo mamasumasu ngolunta. Tontu istimewa do las ni rohanta molo jumpa bulan Desember. Godang do basabasa ni Tuhan na boi idaonta jala daionta. Asa songon las ni roha angka parmahan i, dipataridahon borhat tu Betlehem laho mamereng huhut manomba Posoposo na imbaru tubu i, songon i ma nang hita. Tarajumi do naung sorang Jesus i di rohanta, asa gabe lam hobas ma hita laho mamuji nang pasangaphon Ibana. Molo nunga mian Ibana di roha nang ngolunta, bolong ma hagangguon, hatahuton, laos tubu ma singkat ni i semangat na imbaru, nang las ni roha godang di hita. Amen.
Posting Komentar