Jamita Minggu 11 Mei 2025 Minggu Jubilate tarsurat di Hesekiel 34 ayat 11 - 16. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Debata na Marmahani BangsoNa." Rap ma hita mangihuthon hatoranganna.
Pendahuluan
Buku Hesekiel on i ma buku na marisihon panurirangon dohot pangungkapon na jinalo ni si Hesekiel na manghamham ojahan taringot tu pemulihan ni bangso Israel, panguhuman siala ni angka dosa nasida, dohot pangungkapon hamuliaon ni Debata. Panurirang Hesekiel, i ma sahalak malim (Hesekiel 1 : 3) na dohot tarbuang tu Babel di habuangan na parjolo di taon 597 SM, di tingki harajaon ni Raja Joyakim manang si Jekonia. Di tingki i, ndang sude dope bangso i dibolonghon, holan sebagian do, i ma raja i dohot sandok pangisi ni bagasna, angka parhaladona, angka partogi ni parangan dohot siramoti bagasna, angka induk dohot na marhuaso, angka tukang hau dohot tukang bosi, rodi saluhut halak sialo musu (patudos 2 Rajaraja 24 : 10 - 16). Di habuangan i, dijou jala dipabangkit Debata do si Hesekiel gabe panurirang laho pasahathon hataNa, parjolo sahali tu donganna sabangso angka na tinggal dope di tano Juda dohot Jerusalem. Ndang dumenggan nasib nasida sian dongan nasida angka naung jumolo tarbuang i, molo so muba rohanasida, sai na dohot do nasida muse tarbuang (patudos Hesekiel 1 - 24). Domu tusi, dilumbahon do uhum dohot tu angka bangso parbegu, i ma Arnon, Moab, Edom, Palistin, Tirus Sidon dohot Misir (patudos Hesekiel 25 - 32). Dung saut uhum i, tarboan Juda angka na tinggal i dope tu Babel di habuangan paduahon na masa di taon 587 SM. Gumodang ma ibana manaringoti bagabaga na ni Debata taringot tu pemulihan ni bangso i dohot bagas joro i (patudos Hesekiel 33-48).
Bindu 34 on masuk ma tu horong na manaringoti ulaon dohot tanggung jawab ni sahalak parmahan ni bangso Israel, i ma na hoding manaringoti sikap dohot tindakan ni sahalak "partogi / raja" na digombarhon gabe parmahan na marmahan dirina sambing na bosur manganhon tabotabo, angka birubiru ndang dipargogoi, na marsahit ndang didaoni, laos mampar ma birubiru i ala so adong siparmahan, gabe sipanganon ni saluhut binatang jala marserak. Di tingki ni turpuk on gok hasusaan bangso Israel ala partoginasida ndang be parmahan na denggan, nunga gabe pamangus maradophon na torop na ginomgomanna.
Turpuk jamita na di ayat 11-16, na pinaandarhon ni Debata tu si Hesekiel na Debata laho marlulu dompak angka parmahan na so mamparmahani na pinarmahanna. Ala nunga torop partogi na manegai tohonan haparmahanon i, ala angka parmahan di tingki i ndang be siramoti dohot silehon hasonangan tu bangso i. Alai gabe si pa ro hasusaan tu angka na pinarmahanna. Dipatuduhon Debata, Ibana gabe Parmahan na denggan na mangalului na mago, mangalilit na mabugang, na mampargogoi birubiru na marsahit. Songon parmahan na denggan Ibana, Debata sandiri na marmahani BangsoNa.
Pembahasan
1. Parmahan na mananda jala na manghaholongi na pinarmahanna. Marhite bindu 34 on boi do taida na pinatorang ni si Hesekiel taringot mansai andul marasing parmahan na denggan dohot parmahan na niupaan. Marasing do hape parmahan na denggan dohot parmahan na niupaan, ai so ibana nampuna birubiru i. Molo halak na niupaan, i ma parmahan na mangula hombar tu upa na jinalona. Sahalak parmahan na niupaan, ndang haru dilehon rohana laho manjagahon birubiru i, jala ndang olo ibana manghophop birubiru i sahat tu na agoan hosa. Ai molo masa parmaraan, parjolo do ibana manarihon dirina unang na birubiru i. Maringkati do ibana paholang diri sian parmaraan, laos tading ma angka birubiru i soada be na marmahani. Ujungna deba sian birubiru i dipangan babiat panoro, jala deba nari maringkati marserak dao sian punguan ni birubiru i.
Digombarhon si Hesekiel, na Debata do Parmahan na mananda na pinarmahanna i ma parmahan na denggan na marmahani so ala ni upa, alai ala holong ni rohaNa do umbahen na diula Ibana gabe sahalak parmahan. Parmahan na denggan, i ma na mananda situtu angka birubiruNa, na mangalului angka birubiruNa na marserak asa unang gabe sipanganon saluhut binatang di ladang. Ala na ditanda Debata do angka na pinarmahanNa jala na hinaholonganNa, umbahen i ma didok Tuhan Jahowa "Ida ma, Ahu, apala Ahu sandiri usouso sogot di birubirungKu, jala luluanHu nasida" (ayat 11). Di adopan ni Debata mansai arga do birubiruNa i di Ibana (patudos Jesaya 43 : 4a), umbahen i ndang dipaloas Debata lilu/mampar birubiru i, diramoti jala dijaga Debata. Suang songon i ma di hita jolma na tinompa ni Debata di parngoluonta si ganup ari, ndang dipaloas Debata hita mandao sian Ibana songon birubiru na lilu. Dipajonok Debata hita rap dohot Ibana asa saor hita angka na porsea rap dohot Ibana di bagasan parlinggomanNa, malua ma hita sian ari ombun dohot haholomon marimpotimpot (ayat 12). Marhite ayat on dipatogu pos ni rohanta, holan tu Ibana hita marhaposan na mampargogoihon hita malua sian nasa hagogotanta.
Angka birubiru ni Debata na sian duru ni Jahudi ditogutogu Jesus asa sada dohot naung pinarmahanNa i. On ma na patuduhon hararat ni hakristenon di portibi on. sahat do panghobasionNa tu birubiru na lilu, asa mulak tu inganan nang dalan na sintong i, on ma ulaon na tinuju ni halak Kristen, ulaon parmahanion, i ma ulaon marbarita na uli na tongtong disoarahon di ganup tingki. Ai ndada holan birubiru naung diparmahani nuaeng, alai lobi sian i ingkon boi do boanonta tu Debata asa ndada hot be nasida di dalan haliluon i, alai gabe rap nasida dohot Kristus. Marhite ulaon marbarita na uli, anggiat ma ditangihon birubiru i soaraNa gabe rap dohot punguan na mangihuthon Kristus di bagas joro na badia i.
2. Parmahan na mangondingi hita sian parmaraan "Ahu sandiri na marmahan birubirungKu ... " (ayat 15). Dipatandahon Debata diriNa gabe si Parmahan, alai ndada holan sada Parmahan sambing, alai Parmahan na denggan na marmudumudu jala manghophop angka birubiruNa. Molo marsahit birubiruNa i, na tuk do Ibana mangarorot asa haru tibu nian tanggal parsahiton i jala lam hipas, dohot mangalilit angka na mabugang sian birubiru i (ayat 16). Dipatuduhon, diseahon parmahan ni halak Israel do hosana laho manghophop birubiruna laho manogihon nasida ruar sian parungkilonna (ayat 13). I do hasurungan ni parmahan ni halak Israel ala diseahon hosana mangondingi na pinarmahanna. Ala ni i do digoari angka raja, partogi ni Israel parmahan. Marsiranggut si Daud dohot singa laho mangondingi dorbiana (patudos 1 Samuel 17 : 34 - 36), ndang hea mabiar jala ganggu angka parmahan na denggan marsiranggut manaluhon babiat panoro. Jala parmahan i ma na pinatudos songon Jesus na patuduhon panghophoponNa tu sude jolma. Diseahon diriNa di Golgata, asa malua jolma sian uhum dosa i. Jolma hian do na ingkon gantung di silangNa i, alai ala holongNa di jolma, Ibana sandiri mate di silang i. I ma panghophopon ni Jesus di jolma. Jamita on paingothon asa unang mabiar hita. Ai dilehon Tuhan i do jaminan ni pandonganionNa di hita, "sai na dongananHu do hamu ganup ari, rasirasa ro ajal ni hasiangan on", ninna Tuhan Jesus (patudos Mateus 28 : 20). Saluhutna na pinarmahan ni Debata disarihon, diondingi jala dihophop.
3. Debata, Parmahan na manarihon jala mamboan ngolunta tu hasonangan. Dilului parmahan i do jampalan na lomak asa tusi dipatongon birubiruna i manggagat, ndang dipasombu sasada birubiru i mangalului jampalan na lomak. Parmahan i do na mangalului jampalan na lomak asa butong jala mokmohan birubiruna, ndang holan jampalan na lomak dilului (ayat 14), dilului do nang mata mual, aek na tio asa unang mauas birubiru i. Di Psalmen 23 didok "aek hasonangan", ndang asal aek dilehon soburon ni dorbia i, alai aek tio, aek na bebas kuman, aek na mambahen kesegaran, na pasombu uas, i ma gombaran ni panarihon ni Debata di na tinompaNa. Songon parmahan na denggan Jesus, umbotoan do Ibana aha na ringkot di ngolunta songon parmahan na denggan Ibana, ndang sude pangidoanta i dialusi, i do patuduhon Jesus parmahan na denggan. Pos ma rohanta, Ibana do marnahani hita. Jala sude sangkap ni Debata mamboan tu hadengganon.
Jesus do pintu hasonangan, Jesus do dalan masuk tu hasonangan. Ala Ibana do dalan masuk tu hasonangan, ingkon di jolonta Ibana paihutihutonta, unang dipudinta mangihuthon hita. Ala ditanda do hita, ndang ringkot hita mabiar. Ala ditanda Jesus do angka birubiruNa, i do patuduhon na tutu hita paluaonNa. Molo tabahen Jesus di jolonta, molo Ibana taihuthon, lam mararga ma ngolunta. Alai molo lam holang hita sian Tuhan i, lam susa ma ngolunta. Jesus do pintu i. Ibana do sipatudu dalan tu hasonangan. Ibana do dalan sipatuduhon dalan tu hamajuon dohot masa depan na denggan di halak na porsea tu Ibana marhite na pinatudu jala diboan Debata hita laho mangulon di pardumaan na denggan, dohot dapotan jampalan na lomak angka na mangihuthon jala na marhaposan tu Ibana.
Kesimpulan dan Refleksi
1. Debata na marmahani bangsoNa, tarida ma sian na pinatuduhon ni Debata gabe parmahan na mangalehon angka na denggan tu saluhut angka tinompaNa. Ibana do na manompa hita tumiru rupaNa, tudos tu pangalahoNa. Ala ni i, Ibana ma tahaporseai saleleng mangolu hita di portibi on. Jesus do Debata na paluahon hita sian hadosaon, jala na manogu hita tu jampalan na lomak. Ala ni i tutu na didok BE. No. 188 ayat 1 "Jahowa si Parmahan au, ndang hurang manang aha, ai nasa jea dipadao do sian dorbiaNa, tongon dibahen na lomak i laho pangoluhon tondingki dibahen asi rohaNa". Laos i do na nidok di Psalmen 23 : 1 - 6 "Jahowa si Parmahan ahu, ndang hurangan manang aha ... " Molo nunga olo hita diparmahan Debata, dipargogoi do hita mangadopi saluhutna angka hamaolon dohot parungkilon na adong di portibi on. Pos ma rohanta, sai didongani Debata do hita saleleng mangolu di portibi on. Nunga gabe parmahan Debata di ngolunta jumpang hita ma las ni roha dohot olopolop, songon nidok ni goar ni minggu sadari on "Jubilate", lapatanna marolopolop tu Debata ma ale sandok tano on (Psalmen 66 : 1).
2. Dipaingot marhite Hesekiel 34 : 11- 16 on, Debata na marmahani bangsoNa. Di saluhut ulaonta si ganup ari, manang tu dia pe hita borhat mangula ulaonta, Debata ma tabahen gabe parmahan di hita. Asa saluhut na tapingkiri, taulahon jala taparsinta, sai diparmahani Tuhan i hita asa sudena i hombar tu lomo ni rohaNa jala baen sangap di goarNa. Molo pe sipata maol angka na taadopi, ingot ma sai na dongananNa do hita, jala sai diramoti do hita di angka sidalananta. Antong tinggil ma hita di soara ni Debata na marmahani hita. Sotung tuminggil hita di soara ni parmahan na asing na boi mamboan hita tu hamagoan. Tinggil ma hita disoara ni Jesus asa sai tongtong hita ditogihon tu asi ni rohaNa. Amen.
Posting Komentar