Jamita Minggu 15 Juni 2025 Minggu Trinitatis tarsurat di Jesaya 61 ayat 1 - 9. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Mambaritahon Taon Parasinirohaon ni Debata." Rap ma hita mangihuthon hatoranganna.
Pendahuluan
Sahat ma hita nuaeng di Minggu Trinitatis i ma Minggu na mangondolhon hasitolusadaon ni Debata, Sitolusada na sun badia jala na tongtong marmulia, Jahowa Debata, AnakNa Tuhan Jesus Kristus dohot Tondi Parbadia. Debata Sitolusada na sun badia naung patupahon haluaon dohot hangoluan tu bangso na hinaoholonganNa, na pabangkithon naposoNa laho mambaritahon taon parsinirohaon ni Debata tu sude bangso. Ise do hita na so manghalomohon barita haluaon. Ganup jolma pasti do masihol manangihon barita haluaon taringot tu dirina. Molo adong halak mansogohon barita haluaon tu dirina pasti adong do na sisungkunon tu dirina, manang patabohu dope di ibana di hahurungan, manang hagolapon. Barita haluaon on i ma sada panondang laho manondangi manang hinsu mamungka hurungan manang rante.
Turpuk Jamita on i ma barita haluaon na binoan ni naposo ni Debata tu halak Israel jala dibaritahon do tu saluhut bangso asa angka bangso ro rap dohot halak Israel mamuji TUHAN. Marhite i taruli ma angka bangso di haluaon i. Haluaon na binaritahon ni naposo ni Jahowa, Debata ni Israel i ma haluaon na so sian jolma, alai Jahowa sandiri na patupahon haluaon i. Ndada ala ni hadirion ni jolma i, alai ala Jahowa do na patupahonsa, patuduhon huasoNa dohot asi ni rohaNa. Dia ma barita haluaon i, tangkas ma tapaihutihut hatorangan ni turpuk on.
Pembahasan
Jamita on i ma sada sian Buku ni Jesaya horong na patoluhon (Trito Jesaya). Buku Trito Jesaya on paobahon angka pambahenan ni Jahowa tu ngolu ni bangso Israel naung paluahon bangso i sian habuangan di tingki marhuaso harajaon ni Babel. Jala marhite angka na masa tu halak Israel, boi ma bangso na asing, i ma bangso na so mananda Jahowa gabe parsidohot mananda jala mangoloi Jahowa. Nang pe naung mulak halak Israel sian habuangannasida i tu Jerusalem, alai torop dope na ingkon sipadengganon/ sipaulion (dipulihkan) di bangso i, paulihon perekonomian, bagas joro, politik dohot negara. Marhite hapanurirangon ni panurirang on naeng ma sai ingot bangso Israel di pangaramotion dohot haluaon naung pinatupa ni Jahowa. Ingkon pasidingon ni bangso Israel do angka bangkobangko na so hinalomohon ni Jahowa, isarana manghaporseai jala manomba angka ganaganaan manang debata sileban. Unang be sai diulahon bangso i angka dosa songon naung diula nasida andorang masa habuangan.
Jamita on paboahon taringot na dipabangkit Jahowa do naposoNa di tongatonga ni ngolu ni bangso i. Ganup panjouon ni Jahowa tu naposoNa, disi adong do panghirimon jala disi adong do haluaon. Naposo ni Jahowa na mamboan goar ni Jahowa di hapanurirangonna, jala marlapatan do i, na paboahon na ingkon diulahon bangso Israel songon bangso na niasian ni Jahowa. Marhite ayat 1 turpuk Jamita on dipaboahon naposo ni Jahowa i, na songgop do tu ibana tondi ni TUHAN Jahowa. Tondi na so sian portibi on, alai sian Jahowa. Jala marhite tondi naung songgop tu naposo ni Jahowa, tanda ni na naung dipabaingkit Jahowa ibana gabe parhitean ni Jahowa, laho pasahathon tu bangso Israel barita haluaon, manang barita las ni roha. Molo Tondi ni Jahowa manonggopi jolma, marhite Tondi i diajari do taringot tu angka na hinalomohon ni Jahowa, jala patulushon sangkap ni Jahowa. Ndada sangkap ni portibi manang hagiot ni daging na naeng digohi Tondi ni Jahowa, alai sangkap ni Jahowa do na dipatulus jala dihalunghon do Jahowa. Marhite ayat 1 on tangkas do dipaboa naposo ni Jahowa na mandapot hagogoon dohot habisukon sian Jahowa, marhite tondi ni Jahowa naung songgop tu ibana.
Marhite ayat 1 on tangkas ma dipaboa naposo ni Jahowa ibana sahalak naung nimiahan ni Jahowa marhite Tondi i. Halak na nimiahan, i ma halak naung mandapot sada ulaon gabe panurirang manang panggomgomi di tonga ni bangso Israel. Molo ro sahalak na nimiahan tu huta i, boi do dame boanonna, alai boi do gabe paruhuman tu bangso na manghasogohon haroro ni na nimiahan i. Masa do pangantusion uju i, manulak sahalak na nimiahan, marlapatan do i manulak na marsuru ibana, i ma Jahowa. Haroro ni na nimiahan mamboan panghirimon marhite Barita na Uli, i ma barita haluaon tu halak na dangol, pauliuli halak parroha na bojok, maningtinghon haluaon tu na tarhurung dohot tu halak na tarrante, buka ni hurungan. Saluhutna i martudutudu tu haluaon na pinatupa ni Jahowa mangalehon ngolu haimbaruon, hasesaan ni dosa dohot ngolu na gok haluaon sian anggukangguk sian dosa na binahen ni angka ompunasida i, andorang habuangan.
Di ayat 2 diuduti muse ulaon ni na nimiahan i, i ma maningtinghon taon parasinirohaon sian Jahowa, dohot ari partubolon ni Debata mangapuli saluhut halak na marsak roha. Taon parasinirohaon i ma taon haluaon, manang taon habasaon ni Jahowa. Jahowa sandiri marhite naposoNa mangalehon apulapul marhite pemulihan ni bangso i mulak muse gabe sada bangso. Jala ndang pola be sai marsak bangso i hinorhon ni angka dosanasida dohot ompunasida, ai nunga ro Jahowa marhite naposoNa paboahon hasesaan ni dosa.
Ayat 3, laho pahinsahon roha ni halak na marsak di Sion, mangalehon tu nasida tumpal singkat ni sirabun, miak las ni roha singkat ni arsak ni roha, ulos na marhadohoan singkat ni tondi na tahuton, gabe targoar nasida "hariara hatigoran, suansuanan bahen pujipujian di Jahowa." Sude di ayat 3 paboahon las ni roha na so halompoan singkat ni arsak ni bangso i. Diumpamahon do bangso i gabe songon sada suansuanan hariara hatigoran songon sada tanda tu bangso humaliang tu hatigoran ni Jahowa marhite bangso Israel. Jala marnida i, gabe tubu ma roha gabe manomba Jahowa.
Di ayat 4 adong ulaon paulihon naung tarulang di hamamasa habuangan, nang huta di sandok Israel dipauli dung tarulang. Na ringkot sipaulion ni bangso i, i ma bagas joro (inganan parsombaon) dohot Jerusalem, ala nadua i do hataridaan naung mulak bangso Israel gabe sada bangso. Sian on ma patar idaon ndang tu hasesega manang halelengse hapatean ni bangso na niasian ni Jahowa, alai marudut do tu paulihon. Nunga malengse be Israel binahen ni dosanasida, alai tung balga situtu do holong ni Jahowa, di parrimasNa i do adong hasintongan, jala di hasintongan i pe adong do asi ni roha. Holan ala asi ni roha ni Jahowa sambing do boi malua jolma i jala dilehon do tingki laho mulak sian habuangan i, laos diuduti laho paulihon angka naung malengse manang tarulang di Jerusalem.
Ayat 5-7 i ma udut ni barita haluaon, barita las ni roha tu bangso i jala marpanghorhon do i tu bangso sileban na di humaliang ni Israel. Tung balga situtu do angka pambahenan ni Jahowa tu bangso i. Pambahenan na manghorhon haulion dohot las ni roha na so halompoan.
Di ayat 8 tangkas do dipaboa, "Ahu do Jahowa". Molo pandohan "Ahu do Jahowa" i ma patuduhon goarNa, jala patuduhon hatongtonganNa dohot huasoNa. Jahowa, Debata na holong roha di hatigoran, alai na magigi mida tabantaban pangarupaon; sai lehononHu do upanasida di bagasan hasintongan, jala pahotonHu tu nasida padan salelenglelengna (ida Jesaya 55 : 3 - 5; Jeremia 31 : 31; 32 :40; Hesekiel 16 : 60; 37 : 25 - 26; Maleakhi 3 : 1 - 2). Ndang dihalomohon Jahowa bangso Israel, songon bangso na niasianNa mangulahon ragam pangarupaon ala hasintongan do sude uhum ni Jahowa. Marhite ayat 8 on, dipaboa do aha na ingkon diula bangso i dung haruar sian habuangan, i ma mangulahon hasintongan dohot hatigoran. Mangulahon hasintongan dohot hatigoran i ma ulaon hadaulaton (melakukan kebenaran dan keadilan adalah buah dari ibadah). Jahowa, Debata na holong roha tu hatigoran jala ganup bangso na manomba Ibana ingkon ma mangulahon hatigoran dohot hasintongan. Mangulahon hatigoran dohot hasintongan marlapatan do i mangulahon holong. Manghaholongi Jahowa marhite na mangulahon hatigoran dohot hasintongan jala marlapatan manghaholongi donganna jolma. Ndang adong be roha na manangkapi pangarupaon tu donganna na gale manang na pogos.
Marhite mangulahon hatigoran dohot hasintongan na marlapatan mangulahon holong, tarbarita ma bangso i tu angka bangso parbegu (bangso na so manghaporseai, manang na so manomba Jahowa gabe Debatana), bangso Israel i ma bangso na tarpasupasu (ayat 9). Bangso na mangulahon hatigoran dohot hasintongan i ma bangso na tarpasupasu. Jala marudut pangantusionna, bangso na mangulahon holong i ma bangso na tarpasupasu. Las ni roha bangso na tarpasupasu i ma songon las ni roha ni sahalak pangoli dohot oroan. Las ni roha na so tarhatahon jala so habilangan angka las ni roha na dipanghilalahon ibana (ayat 10). Las ni roha manomba Jahowa di bagasan hatigoran dohot hasintongan. Jala halak na tarpasupasu ingkon do marparbuehon parbue hatigoran dohot hasintongan di tongatonga ni bangso na so manomba Jahowa. Ndung diida bangso sileban saluhutna i, jala dihilala parbue ni bangso na tarpasupasu na sian Jahowa, gabe mananda hatigoran dohot hasintongan i, jala laos tubu ma roha na manomba Jahowa di ngoluna.
Kesimpulan dan Refleksi
Turpuk Jamita on digohi ma i di bagasan hadirion ni Jesus Kristus (ida Lukas 4 : 16 - 19). Jesus Kristus do Naposo ni Jahowa. Debata na tutu jala holan Ibana do parhitean ni Jahowa patuduhon hasintongan dohot hatigoran ni Jahowa. HaroroNa tu portibi on mamboan haluaon naung dihirim ganup jolma. Ringkot do botoonta, haroro ni Jesus ndang na laho paluahon jolma i sian parungkilon ni pamatang, alai paluahon sude rante ni dosa dohot soropna, paluahon angka na porsea sian hurungan manang hisap ni dosa, hagiot ni daging dohot portibi on. Asa marhite i saluhutna, ndang mabiar be jolma i mandalanhon ngoluna nang pe ingkon marungkil manang manaon na hansit sian portibi on.
Halak naung pinalua ni Jesus sian rante ni dosa dohot hisap ni dosa, i ma halak naung tarpasupasu jala halak na mangulahon hatigoran dohot hasintongan. Ala ni i, naeng ma muse boi halak mandai tonggi ni parbue ni halak naung pinalua ni Jesus, marhite pangurupion dohot holong tu ganup jolma. Ndang adong be roha na manangkapi pangarupaon, dohot hajahaton tu angka donganna. Halak na tarpasupasu ndang pola marlapatan halak naung mamora manang godang artana, alai halak na tarpasupasu i ma halak na mamamangke pasupasu i gabe pasupasu tu donganna, isarana gogo, pingkiran, dohot na boi mangurupi tu na patut urupon. Halak na tarpasupasu i ma halak na marlas ni roha di bagasan TUHAN i, na marlapatan marlas ni roha di panombaon tu Jahowa marhite Jesus Kristus.
Antong, molo taparhatopot do Jesus naung paluahon hita sian dosa dohot hamatean ndang boi be marsidalian ndang mangulahon na dihalomohon Debata sian hadirionta. Marhite hadirionta lam torop ma jolma marnida angka na denggan na sian Jahowa, laos udut tu panombaon tu Jahowa marhite Jesus Kristus. Unang sai tapaima donganta mambahen na denggan tu hita, alai ingkon jumolo ma hita mangulahon ulaon na denggan tu jolma ala naung pinalua ni Jahowa hita marhite Jesus Kristus. Unang hirim jolma na asing mambaloshon na denggan tu hita ala ulaonta i, alai hirim ma bagabaga ni Tuhanta tu hita naung tarpasupasu di bagasan Tuhan i di ngolunta. Amen.
Posting Komentar